Mbappé breyt nøsina

Fótbóltsevropa helt ondini í gjárkvøldið - og serliga tey í Fraklandi - tá ein av allarstørstu stjørnunum og bestu spælarunum í endaspælinum lá á vøllinum við nógvari pínu. 

Tá endurtøkurnar vórðu vístar, varð skjótt greitt at Kylian Mbappé hevði fingið skaða í nøsina. Eingin heilaskjálvti men blóðið stóð úr nøsini, sum eisini sá skeiv út.

Hetta var eftir, at franski liðformaðurin hevði stútað bóltin, og at nøsin síðani rakti hørðu økslina á verjuspælaranum Kevin Danso.

Blóðið stóð frá nøsini 

Myndir: EPA

Mbappé varð útskiftur í 89. minutti. Frakland vann 1-0 á Eysturríki, men so at siga alt aftaná snúði seg um støðuna hjá stóru stjørnuni hjá Fraklandi. 

Tað stóð skjótt greitt, at nøsin allarhelst var brotin, og hetta varð sjótt váttað. 25-ára gamli áleyparin varð koyrdur á sjúkrahús í Düsseldorf. Hann skal tó ikki skurðviðgerast og er tí útskrivaður.

- Nøkur hugskot til eina masku ?

Soleiðis skrivaði Kylian Mbappé sjálvur á sosiala miðlinum X eftir midnátt. Franska fótbóltssambandið hevur váttað, at liðformaðurin verður við aftur - við masku.

Eingin tíðarlinja er tó givin. Frakland spælir aftur fríggjakvøldið móti Niðurlondum. Hvirluvindurin úr París má roknast sum ivasamur til hendan dystin. Tað er helst eftir, hvussu brotið er, og hvussu tað lekir.