Myndir: A-landsliðið er byrjað at fyrireika seg til EM

Føroyska A-landsliðið við monnum hevur sína størstu uppgávu nakrantíð á skránni í januar. Kring jólini og fram til 11. januar hevur liðið nógva tíð saman, men áðrenn tað er tað bert hendan vikan.

Hópurin savnaðist í Høllini á Hálsi í dag, har venjaratoymi fyrst hevði eitt upplegg fyri spælarunum. Síðani var ein løtt venjing á skránni í høllini.

Føroyska liðið er saman í hesari vikuni. Fríggjamorgunin ferðast hópurin til Íslands, har spælt verður fríggjakvøldið klokkan 19.30 og síðani aftur leygardagin klokkan 17.30.

Elias Ellefsen á Skipagøtu bergtekur hondbóltsevropa fyri Kiel í Champions League. Føroyski spælarin var í dysti í Bundesliguni í dag, har hann skoraði fimm mál í tryggum sigri hjá Kiel.

Systkinabarnið Óli Mittún gjørdist dagsins maður fyri IK Sävehof, sum vann greitt í bestu svensku deildini í dag. 18-ára gamli hoyvíkingurin skoraði heili tólv mál í dag.

Harvið vóru teir báðir ikki við til fyrstu venjingina. Tað vóru Kjartan Johansen, Pætur Mikkjalsson og Rói Ellefsen á Skipagøtu heldur ikki - eisini orsakað av dystum.

Strikuspælararnir Teis Horn Rasmussen og Helgi Hildarson Hoydal sótu uttanfyri við snuddum.

Sí myndir frá venjingini í kvøld: