Fótbóltur

Nú rullar Champions League bólturin aftur

Størsti dysturin í kvøld er á Old Trafford, har Manchester United fær vitjan av Valencia.

Manchester United venjarin, Jose Mourinho (Mynd: EPA)

Manchester United venjarin, Jose Mourinho (Mynd: EPA)

2018-10-02 16:39 Author image
Ari av Rana
placeholder

Champions League fótbóltur er aftur á skránni í kvøld, tá fyrstu dystirnir í næsta umfari verða spældir.

Størsti dysturin í kvøld verður spældur á Old Trafford í Manchester, har Manchester United fær vitjan av spanska felagnum Valencia. Fyri venjaran hjá Manchester United, Jose Mourinho, er talan um ein týdningarmiklan dyst, tí at vánalig úrslit higartil í ár hava lagt stórt trýst á venjaran, sum er favorittur til at verða fyrsti venjarin í Premier League, sum verður koyrdur hetta kappingarárið.

Í hinum dystinum í bólkinum tekur italska meistaraliðið Juventus ímóti Young Boys úr Sveis.

Ensku meistararnir úr Manchester City fara á vitjan hjá týska Hoffenheim. Manchester City hevur fingið ein góða byrjan uppá kappingarárið og liggja nummar eitt í Onglandi. Hoffenheim hevur megnað at spælt seg til Champions League í ár, og talan verður óivað um eina torføra uppgávu hjá týska liðinum. Tað kann eisini gerast trupult hjá Manchester City, sum nokk hevur eitt eyga á dystin sunnudagin, tá liðið skal spæla oddadyst móti Liverpool á útivølli.

Týska Bayern Munchen, sum hevur vunnið Champions League tríggjar ferðir, tekur á heimavølli ímóti Ajax úr Niðurlondum, sum hevur vunnið kappingina 4 ferðir. Men meðan Bayern Munchen verður talt sum eitt av fremstu liðunum í heiminum, kann tað sama ikki sigast um Ajax. Bayern Munchen eru stórir favorittar til dystin í kvøld.

Champions League meistararnir úr Real Madrid spæla í kvøld í Moskva, har CSKA Moskva tekur ímóti. Vanliga er hetta ikki nakað torført mótstøðulið, men ofta hevur tað víst seg, at russisku liðini væl kunnu gera ein vørr á heimavølli.

Dystirnir, sum verða spældir í kvøld eru:

Kl. 17:55

Hoffenheim – Manchester City

Juventus – Young Boys

Kl. 20:00

AEK Athens – Benfica

Bayern Munchen – Ajax

Lyon – Shakthar Donetsk

CSKA Moskva – Real Madrid

Roma – Viktoria Plzen

Manchester United – Valencia

placeholder

Vinarliga broyt tínar kennifíla - og privatlívsstillingar fyri at síggja hetta innihald

placeholder