Nú snýr tað seg av álvara um at avrika á degnum

Skotland, Ungarn, Albania, Kroatia, Serbia, Pólland, Kekkia og Ukraina. Hesi átta londini eru ikki longur í EM-endaspælinum. Tað er greitt eftir bólkaspælið, sum var av fyrr í vikuni.

Tveir triðingar av liðunum, sum løgdu fyri fyrr í mánaðinum, eru eftir í Týsklandi. Næstu dagarnar verður talið koyrt niður í eina helvt.

Áttandapartsfinalurnar í EM-endaspælinum

Í dag, leygardagin 29. juni
17.00: Sveis - Italia (DR1/DR TV)
20.00: Týskland - Danmark (TV2/TV2 Play)

Í morgin, sunnudagin 30. juni
17.00: Ongland - Slovakia
20.00: Spania - Georgia 

Mánadagin 1. juli
17.00: Frakland - Belgia
20.00: Portugal - Slovenia 

Týsdagin 2. juli
17.00: Rumenia - Niðurlond
20.00: Eysturríki - Turkaland

Stórur spenningur er undan fyrstu áttandapartsfinalunum. Evropameistararnir úr Italia eru í lítlum favorittleikluti móti Sveis. Grannarnir bresta saman í Berlin, og lagt er upp til spennandi dyst. Sveis er eitt lið við greiðari ætlan og sterkum spælarum. Liðið vísti seg sum heild væl fram í bólkaspælinum og var bert minuttir frá at koppa týsku vertunum og harvið taka 1. plássi í bólkinum.

Italia var heilt nær við at enda sum trý'ari í bólkinum, men í 99. minutti í seinasta umfarinum sendu evropeameistararnir Kroatia út. Liðið hjá Luciano Spaletti er nakað veikari enn tað, sum lyfti steypið á Wembley fyri trimum árum síðani, men italiumenn eru snildir og kunnu taka enn eitt fet móti heilt spennandi plássunum í kvøld - tað er als ikki ósannílkt, at tað fer í longda leiktíð.

Tað var nær við, at tað varð Sveis - Danmark. Týskland tó framvegis ósigrað. Tá tað ikki longur er veruleiki, er yrkisleiðin hjá Toni Kroos av (Mynd: EPA)

Fótbóltstýskland heldur ondini, nú tímarnir fækkast til fyrsta "vinn ella takka fyri seg-dystin". Hjá týsku favorittunum snýr tað seg um at avrika, og at tað ikki endar sum fyri 32 árum síðani í Göteborg móti Danmark. Liðið hjá Julian Nagelsmann sá skinklandi út móti Sveis, men tá var plássið her tryggjað - nú skulu Kroos, Gündogan, Musiala, Rüdiger, Neuer og allir hinir royna at senda danir heim.

Kasper Hjulmand og hansara menn hava nakað fríari spæl, men liðið hevur ikki vunnið í endaspælinum enn, og atfinningar eru avgjørt í Danmark. Í mun til at vera væl skipað, hevur tað ikki bilað - tað hevur heldur vantað ymiskt í álopspartinum - men nú hækkar góðskan á mótsstøðuni aftur. Ongland rakti als ikki sítt toppstig móti Danmark. Um Týskland ger tað í Dortmund, so verður hetta ikki nakað minniligt EM fyri danskan fótbólt.

Sí eisini: Óvissa um Eriksen

Meira seinni.