Rasmus heldur fram sum hjálparvenjari í HB

HB hevði eitt frálíkt kappingarár við FM og stigametið. Høvuðsvenjarin, Heimir Guðjónsson, ið kom úr Íslandi seinasta vetur, hevur fingið nógv rós fyri at fáa HB aftur í oddin.

Hansara hjálparvenjari hevur verið Rasmus Nolsøe. Í kvøld kunngerð HB á heimasíðu sínari, at 33-ára gamli fyrrverandi verjuleikarin heldur fram sum høgra hond hjá Heimiri:  

Aftanfyri hvønn sterkan mann stendur ein sterk kvinna, og aftanfyri hvønn sterkan høvuðsvenjara stendur ein sterkur hjálparvenjari.

Vit hava í dag longt sáttmálan við høgru hond hjá Heimiri, Rasmus Nolsøe. Tvøramaðurin hevur staðið undir liðini á íslendska venjaranum í ár, og vit eru sera fegin um, at tað fer hann eisini at gera næsta ár.

Sum leikari var hann kendur sum maðurin við gylta vinstrafótinum. Hann byrjaði sína yrkisleið í TB, men skifti í 2004 til HB og bleiv hjá okkum í fimm ár. Tilsamans hevur hann spælt 129 dystir í bestu deildini og skorað 19 mál. Seinastu tvey árini hevur hann so verið hjálparvenjari í felagnum, fyrst hjá Siggi í fjør og so hjá Heimiri í ár.

Hann veit, hvat krevst fyri at blíva føroyameistari, tí hann royndi tað heili tríggjar ferðir sum spælari, í 2004, 2006 og 2009. Og í fjør sum hjálparvenjari

Kelda: hb.fo