Stórur áhugi fyri landsdystunum á Tórsvølli komandi ár

Í morgun klokkan 10.00 varð sølan av Landsliðspakkanum fyri 2019 hjá FSF opnað. Hesin pakkin gevur atgongd til allar fimm heimadystirnar hjá A-landsliðnum hjá monnnum í EM-undankappingini komandi ár.

Fótbóltsssambandið upplýsir fyri Portalinum, at fyrsta hálva tíman vóru 400 slíkir pakkar seldir, og at sølan síðani hevur verið støðug. Nú út á seinnpartin er talið longu komið uppum 600. 

Sølan til einstakar dystir á Tórsvølli í 2019 opnar seinni, men tað er longu greitt, at nógv atgongumerki til dystirnar eru farin. Meðan umbyggingin er í gongd, har gamla FSF-húsið var, er pláss til áleið 3500 áskoðarar á tjóðarleikvøllinum, og íroknað tað er millum annað eisini, so og so nógv pláss sum skal vera tøkt til áskoðarar hjá útiliðnum. 

Úr FSF verður sagt, at umbyggingin verður heilt liðug á vári í 2021, og tá verður pláss til umleið 5,500 áskoðarar á Tórsvølli.

Heimadystirnir hjá A-landsliðnum komandi ár: 

7. juni:

Føroyar – Spania

10. juni:

Føroyar – Noreg

5. september:

Føroyar – Svøríki

12. oktober:

Føroyar – Rumenia

15. oktober:

Føroyar – Malta