Hondbóltur

Systkinabørnini í Svøríki skoraðu samanlagt 10 mál

Óli Mittún var toppskjútti í dystinum, og Sävehof var leingi á sigurskós. Men Rói Ellefsen á Skipagøtu og Hallby tryggjaðu sær javnleik á útivølli móti meistarunum í síðstu løtu.

Systkinabørnini Mittún og Ellefsen á Skipagøtu. Í gjár spældu teir í miðjuni móti hvørjum øðrum. Rói á Skipagøtu og hansara lið kunnu nýta stigið til meira enn Óli Mittún og ísak Vedelsbøl, sum eisini er Sävehof-spælari (Savnsmynd: Sverri Egholm)

2025-02-26 11:15

Agnar Prestá

Ein av dystunum í fremstu svensku mansdeildini í gjárkvøldið var millum tey bæði liðini í deildini, sum hava føroyskar spælarar í hópinum.

IK Sävehof, við Óla Mittún og Ísaki Vedelsbøl, tók ímóti Róa Ellefsen á Skipagøtu og IF Hallby.

Tað er tætt millum svensku liðini í stríðnum um endaspælsplássini, men Sävehof stendur heilt væl í tí, nú fimm umfør resta í. Hallby liggur á tó á tí síðsta av hesum endaspælsplássunum, og við úrslitinum 31-31 í Partille í gjár heldur Hallby sær har.

Tap var annars í hendi hjá Róa Ellefsen á Skipagøtu. Heimaliðið var á odda við einum máli í steðginum, og við fimm málum einaferð í seinna helmingi av 2. hálvleiki (26-21)

Teir á útiliðnum fullu tó ikki í fátt, og Sävehof steðgaði upp seinastu minuttirnar. IF Hallby javnaði til 31-31 í seinasta minutti; eitt stig sum kann fáa ógvuliga stóran týdning fyri Róa og teir.

Rói Ellefsen á Skipagøtu skeyt tvey mál í Partille. Systkinabarnið skoraði átta ferðir og legði upp til seks mál afturat. Óli Mittún varð toppskjútti í dystinum - Ísak Vedelsbøl er ikki skrásettur fyri nakað mál.

Óli Mittún er í løtuni toppskjútti í svensku deildini (Mynd: Egin Tollaksson Kass)

Vinarliga broyt tínar kennifíla - og privatlívsstillingar fyri at síggja hetta innihald