Tríggjar nýggjar í hópinum

Um smáar tvær vikur setir føroyska A-landsliðið við kvinnum kós móti Marbella í Spania, har hópurin verður á venjingarlegu frá 13. til 22. februar.

Umframt venjingar, vera eisini tveir landsdystir á skránni. Hósdagin 17. februar spæla Føroyar og Norðurírland á Marbella Football Center, og tríggjar dagar seinni, sunnudagin 20. februar, tekur Gibraltar ímóti Føroyum á Victoria Stadium í Gibraltar, skrivar Fótbóltssambandið á heimasíðuna.

Lene Bjerning Terp, venjari hevur saman við nýggja hjálparvenjaranum, Svenn Olsen, hevur nú kunngjørt nøvnini á teimum 22, ið eru úttiknar til venjingarleguna, og av teimum, eru tríggjar, ið ongantíð fyrr hava verið partur av A-landsliðnum. Talan er um Lenu Olsen og Mirjam Huneck úr NSÍ, og Rúnu Jacobsen úr HB.

Kvinnurnar skula spæla tríggjar HM-undankappingardystir í hesum árinum. Fríggjadagin 8. apríl spæla Føroyar á útivølli móti Ungarn, og síðani eru tveir heimadystir á skránni í september. Fríggjadagin 2. september spæla Føroyar og Ukraina á Tórsvølli, og týsdagin 6. september kemur Skotland á vitjan.

Eisini skulu kvinnurnar eftir ætlan til Norðurmakedónia í juni, har liðið skal spæla tveir venjingardystir, og í oktober skal kvinnulandsliðið til Baltic Cup í Estlandi.

Hópurin, sum er úttikin, er hesin:

• Óluvá Allansdóttir Joensen, KÍ
  
• Maria Biskopstø, KÍ
  
• Birita Ryan, KÍ
  
• Sanna Svarvadal, KÍ
  
• Tóra Mohr, KÍ
  
• Tórunn Højgaard, KÍ
  
• Rakul Maria Johannesen, Oppsal IF (Noreg)
  
• Maria á Lakjuni, Víkingur
  
• Jensa Kannuberg Tórolvsdóttir, Víkingur
  
• Ásla Johannesen, AGF (Danmark)
  
• Julia Naomi Mortensen, AaB (Danmark)
  
• Monika Biskopstø, AaB (Danmark)
  
• Heidi Sevdal, NSÍ
  
• Lena Olsen, NSÍ
  
• Mirjam Huneck, NSÍ
  
• Olga Kristina Hansen, B36
  
• Valborg Østerø, B36
  
• Kára Djurhuus, EBS/Skála
  
• Lea Símunardóttir Lisberg, EBS/Skála
  
• Julia Helena Dal Henriksen, HB
  
• Sarita Maria Mittfoss, HB
  
• Rúna Jacobsen, HB