Fótbóltur

Váttað: Føroyar og Danmark spæla í Herning 7. oktober

Uppgerðin verður áðrenn Nations League-dystirnar á heimavølli í oktober. Óvist er, hvussu nógvir áskoðarar sleppa til dystin.

Hallur Hansson, ið til dagliga spælir í Superligaini, skal í oktober spæla fyri Føroyar á MCH Arena, har hann fyri kortum var við í sigri hjá Horsens (Mynd: Sverri Egholm)

Hallur Hansson, ið til dagliga spælir í Superligaini, skal í oktober spæla fyri Føroyar á MCH Arena, har hann fyri kortum var við í sigri hjá Horsens (Mynd: Sverri Egholm)

2020-07-03 10:15 Author image
Agnar Prestá
placeholder

7. oktober spælir danska landsliðið sín fyrsta dyst í Herning í tvey ár. Tann dysturin verður á hybridvøllinum hjá FC Midtjylland, og hann verður ímóti Føroyum.

Liðini skudlu upprunaliga spæla á MCH Arena 27. mars, men korona legði meinbogar í vegin. DBU váttar fyrrapartin, at nýggj dagfesting er sett á dystin. Hann verður tríggjar dagar, áðrenn Føroyar spæla á heimavølli móti Lettlandi í Nations League, og Danmark vitjar í Íslandi. Føroyar spæla eisini 13. oktober (heima ímóti Andorra), so talan verður um eina strævna men spennandi viku fyri liðið hjá Håkani Erikcson.

Nations League fer í gongd fyrstu vikuna í september, har tveir dystir verða leiktir. Ein mánað seinni er aftur landsliðsfótbóltur á skránni, og Føroyar fáa seg veruliga royndar móti sterka danska liðnum, ið fyrireikar seg til EM á heimavølli. Dysturin verður tann fyrsti millum londini í tjúgu ár, og tað er ein av fyrstu uppgávunum hjá Kasper Hjulmand. Landsliðsvenjarin hjá Danmark kallar føroyska liðið "kompetent"

Sambært DBU er óvist, hvussu nógvir áskoðarar kunnu koma til dystin í Midtjyllandi um góðar tríggjar mánaðir. Nærri kunning um bilettsølu kemur seinni. Í løtuni er ein royndartíð í gongd við avmarkaðum áskoðaratali í Danmark, og sambært donskum miðlum fer stjórin í næstum at góðkenna, at óavmarkað áskoðaratal verður í Superligaini, tá hon byrjar aftur. 

placeholder
placeholder