Agnar Prestá
Ein dystur SMS-deildini varð leiktur í kvøld. Hann var í KÍ-høllini, har VÍF var á vitjan.
Dysturin byrjaði við høgari leikferð og nógvum málum. Tað leikaði javnt á, men sum fráleið uppbygdi VÍF sær eina leiðslu. Hetta komst millum annað av nógvum tekniskum feilum hjá Stjørnuni. Í hálvleikinum var útiliðið á odda 15-11.
Greipuvinnararnir komu sera væl út til 2. hálvleik, og áleið tíggju minuttir inn í hálvleikin var so at siga avgjørt.
Í 1. hálvleiki royndi Stjørnan seg við mansverju av Duritu C. Jojic; í 2. hálvleiki fór heimaliðið at verja meira álopskent og ágangandi ímóti sterku bakketuni hjá VÍF. Hetta eydnaðist til tíðir væl, men vestmannakvinnur vóru bara stinnari; eisini í verjustøðu. Heimaliðið brendi eisini í meira lagi í kvøld.
Samanlagt var VÍF betra liðið og hevur nú 9 stig; tað er eitt færri enn H71, ið hevur leikt ein dyst færri. Stjørnan er næstniðast við trimum stigum.
Stjørnan - VÍF 23-28 (11-15)
Toppskjúttar: Tóra Eliasen 9, Agnas Olsen 7
Vinarliga broyt tínar kennifíla - og privatlívsstillingar fyri at síggja hetta innihald