Víkingur er nú undir niðurflytingarstrikuni

4. umfar í Betrideildini var á skránni í kvøld. Talan var um fult umfar.

Sum vit skrivaðu um fyrr í kvøld, vann FC Suðuroy týðandi og tøttu uppgerðina móti TB.

Sí eisini: FC Suðuroy sigraði í Suðuroyaruppgerðini

Fýra dystir byrjaðu eftir hendan. Av hesum var stóra uppgerðin í Gundadali. Bergur Poulsen, sum er uppvaksin í Víkingi, skoraði í 14. minutti, og hetta var einasta málið í dystinum, sum varð merktur av, at Bergur Gregersen breyt beinið í óhappi í fyrra hávleiki.

Eins og í undanfarnum dystum, hevði Víkingur sínar góðu møguleikar, men bólturin vil ikki inn. Føroyameistararnir hava bert skorað eitt mál - í fyrsta umfari við Stóra, og eru í løtuni javnir í stigum við júst TB: Á 9. plássi og uttan nakarn sigur higartil í ár. B36 vann anann dystin á rað 1-0 og er nú á 4. plássi.

B36'arar fegnast eftir málið hjá leirvíkinginum Bergi Poulsen (Mynd: Sverri Egholm)

Myndir: B36 - Víkingur

NSÍ, HB og KÍ renna avstað. Tey hava øll framvegis fult stigatal.

Fyriuttan 2-1 málið hjá 07 Vestur og fyrstu løtuna eftir steðgin við Løkin, var NSÍ trygt á sigurskós leingi, og Klæmint Andrasson Olsen gjørdi hattrikk. Toppskjúttin úr Rituvík hevur longur skorað átta mál eftir fýra umfør - tað er tvey í miðal og bert eitt færri enn alt síðsta kappingarár í Betrideildini.

HB vann uttan himpr á Eiði, og hevur nú vunnið 7-0 samanlagt seinastu fýra dagarnar. At Emil Grønn Petersen og Jákup Thomsen aftur skora er jaligt fyri Sormani og teir.

KÍ fekk ikki hol á fyrrenn stutt eftir steðgin á Svangaskarði, tá Hallur Hansson skoraði. Tað endaði 0-2; framvegis er KÍ ikki flúgvandi, men liðið hjá Magnus Powell vinnur sínar dystir.

4. umfar í Betrideildini
Hósdagin 3. apríl
FC Suðuroy - TB 1-0 (0-0)
48' Dánjal Godtfred (Jákup Twafik Joensen)

B68 - KÍ 0-2 (0-0)
52' Hallur Hansson 0-1
67' Jóannes Kalsø Danielsen 0-2

NSÍ - 07 Vestur 4-1 (2-1)
6' Klæmint Andrasson Olsen 1-0
22' Emil Weihe Joensen 2-0
45'+1 Nicolai Dohn (Mikkel Jacobsen) 2-1
64' Klæmint Andrasson Olsen (Petur Knudsen) 3-1
84'  Klæmint Andrasson Olsen (Petur Knudsen) 4-1

EB/Streymur - HB 0-3 (2-0)
4' Emil Petersen (Dan í Soylu) 0-1
22' Dan í Soylu, br. 0-2
57' Jákup Thomsen 0-3

B36 - Víkingur 1-0 (1-0)
14' Bergur Poulsen (Marius Kryger Lindh) 1-0

Støðan eftir fýra umfør 
1. NSÍ 12 stig 
2. HB 12 stig 
3. KÍ 12 stig
4. B36 6 stig 
5. EB/Streymur 4 stig
6. FC Suðuroy 3 stig 
7. B68 3 stig
8. TB 2 stig 
9. Víkingur 2 stig
10. 07 Vestur 1 stig

Mánadagin, 7. apríl, er 1. umfar í steypakappingini í morgin