Fótbóltur

Zoran heldur fram í Hoyvík

FC Hoyvík hevði á fyrsta sinni lið í bestu kvinnudeildini í 2024. Serbin heldur fram sum venjari og fær Vernar Restorff Olsen afturat um hjálparvenjara.

Vernar Restorff Olsen og Zoran Vujovic - venjaratoymi hjá Betri kvinnum í Hoyvík (Mynd: FC Hoyvík)

2025-01-31 13:23

Agnar Prestá

Hann kom til Føroya í seinnu hálvu 2019 sum spælari hjá B68. Á summri 2020 skifti Zoran Vujovic til 07 Vestur, har hann spældi nakað, áðrenn hann gjørdist venjari.

Serbin tók síðsta vetur við sum venjari hjá FC Hoyvík-kvinnunum, sum fyri fyrstu ferð skuldu royna seg í Betrideildini.

Liðið endaði aftast við samanalgt átta stigum í grundspælinum og niðara endaspælinum.

Í ár roynir FC Hoyvík aftur, og tað verður eisini við Zorani Vujovic sum venjara. Hesum boðar felagið frá í dag.

Afturat 38-ára gama serbanum verður Vernar Restorff Olsen sum hjálparvenjari. Umframt hetta skal ungi venjarin, sum hevur verið spælari í felagnum, vera høvuðsvenjari hjá U16 gentum.

FC Hoyvík skrivar soleiðis í dag:

Vit gleðast um, at Zoran Vujovic heldur áfram sum høvuðsvenjari hjá Betri kvinnum, og at vit hava fingið Vernar Restorff Olsen í venjaratoymið, har hann verður høvuðsvenjari hjá GU16, umframt at verða hjálparvenjari hjá Betri kvinnum.

Zoran hevur drúgvar venjararoyndir, umframt at hava UEFA B venjaraprógv. Vernar hevur somuleiðis royndir sum leikari, er væl á veg at blíva útbúgvin lærari og er nýliga byrjaður á venjaraleiðini, har hann hevur luttikið á fyrstu venjaraskeiðunum.

FC Hoyvík-liðið eftir fyrsta sigurin hjá liðnum í fremstu røð: Við Stóra móti TB/FCS/Royn (Mynd: FC Hoyvík)

Vinarliga broyt tínar kennifíla - og privatlívsstillingar fyri at síggja hetta innihald