5-mannaróðurin hjá gentum skal rógvast av nýggjum

Róðrarsamband Føroya hevur avgjørt, at 5-mannaróðurin á Eystanstevnu skal ógildast og rógvast av nýggjum á Jóansøku.

Hvalvíkar Streymnesar Róðrarfelag fekk í gjár viðhald í síni kæru um róðurin, tí at fleiri bátar vóru, sum svikstartaðu.

Róðrarsamband Føroya sigur, at heili átta bátar svikstartaðu róðurin. Annika Dalsgarð, forkvinna í Róðrarsambandinum sigur við KVF, at einki annað er at gera enn at døma umróður. Øll stigini frá róðrinum á Eystanstevnu verða tikin burtur.

Umróðurin verður á Jóansøku eftir 10-mannaróðurin.