Annika Lindenskov vald í altjóða oyggjaleikanevndina (IIGA)

Altjóða oyggjaleikanevndin hevur fingið føroyska umboðan. Hetta hendi á aðalfundi hjá International Island Games Association í Orknoyum í dag, tá ið Annika Lindenskov bleiv vald í IIGA. Annika Lindenskov hevur drúgvar royndir í føroyskum ítrótti. Hon hevur arbeitt í Ítróttasambandi Føroya og verið á fleiri oyggjaleikum síðan 2008. Annika er tilreiðar at fara til abeiðis í altjóða oyggjaleikanevndini, har hon fer at brúka sínar royndir oyggjaleikum og IIGA at frama.

- Annika er ein fongur fyri IIGA, og vit gleða okkum til samstarvið, segði Andrew Inkster, formaður í IIGA, á aðalfundinum.

Elin Heðinsdóttir Joensen, forseti í ÍSF, tekur undir við formanninum í IIGA og leggur afturat, at hetta er serstakliga gott fyri føroyskan ítrótt og fer at styrkja um føroysku ávirkanina í oyggjaleikahøpi.

Aðalfundurin hjá IIGA varð hildin, samstundis sum Oyggjaleikir 2025 eru í gongd í Orknoyum. Higartil hava 20. leikirnir verið sera væl eydnaðir við framúrskarandi veðri undir góðum umstøðum. Føroysku íðkararnir hava longu gjørt eitt ordans hál og vunnu 33 heiðursmerki annan kappingardagin.

Nýggj oyggjaleikaheimasíða
Á aðalfundinum vóru eisini framløgur hjá komandi vertsoyggjum á skránni, og um tvey ár eru Føroyar vertir. Teitur Samuelsen, formaður í føroysku oyggjaleikanevndini og Solby Christiansdóttir, oyggjaleikasamskipari, greiddu frá fyrireikingunum til Betri Oyggjaleikir 2027 í Føroyum.

Undir framløguni kom millum annað fram, at leikirnir verða hildnir um alt landið, og at Føroyar vænta einar 2.500-3.000 luttakarar.

Í hesum sambandi varð nýggja heimasíðan hjá leikunum í Føroyum almannakunngjørd. Síðan er at finna á www.føroyar2027.fo ella www.faroislands2027.fo.

Oyggjaleikaheimasíðan er ein týðandi kelda til kunning hjá bæði luttakarum, fjølmiðlum og almenninginum í sambandi við Betri Oyggjaleikir í Føroyum 3.-9. juli 2027.

Tað er samskiftisfyritøkan Sansir, sum hevur ment føroysku oyggjaleikaheimasíðuna.