Ársins flogbóltsleikarar – mesti heiðurin fór til føroyameistararnar

Leygardagin vórðu ársins leikar í flogbólti kosnir, har helvtin av teimum 12 virðislønunum fór til útlendsku leikararnar, og 8 fóru til føroyameistaraliðini, Mjølnir hjá monnum og SÍ hjá kvinnum.

Heitið ársins leikari fór til argentinska leikandi venjaran hjá Mjølni, Cristian Imhoff, sum eisini varð kosin ársins álopsleikari. Hjá SÍ gjørdi ukrainska Svetlana Shvanskaya honum kynstrið eftir og varð kosin ársins leikari og ársins álopsleikari.

Menninir hjá Mjølni áttu eisini ársins blokkleikara í 205 sentimetrar langa Jóhan Arna Elisson Wang, sum valla kemst uttanum – ella uppum – tá tann virðislønin skal handast, og ársins stjørnuskot eiga klaksvíkingar eisini í 19 ára gamla Ólavi Johannesen, sum veruliga hevur bitið seg fastan á liðið.  

Kvinnurnar hjá SÍ fingu fingu eisini tvær virðislønir aftrat. 20 ára gamla Janna Falkvard, sum í 2019 varð kosin ársins stjørnuskot, vann hesaferð heiðurin sum ársins hevari fyri meistarliga spælið á sínum plássi hetta kappingarárið.

Og nógv stjørnuskot eru skapt á talentfabrikkini  hjá Rajko Petrovic í Sørvági. Eitt av teimum er 17 ára gamla Sofía Weihe Simonsen, sum vann júst tann heiðurin hesa ferð: Ársins stjørnuskot.

Eitt annað talent har vesturi frá er 17 ára gamli Silas Poulsen, sum varð valdur til besta verjuleikara. Lærumeistarin, Rajko, var sjálvur valdur til ársins venjara hjá monnum. Rajko boðaði fyri kortum frá, at hann gavst sum venjari hjá SÍ eftir eini 20 ár og 202 finalur og fer at royna seg sum venjara í Serbia.   

Heitið ársins venjari hjá kvinnum fór til Ragnar í Haraldstovu, sum við kønari hond hevur stýrt kvinnunum hjá Mjølni til eitt fjórðapláss. Serliga væl gekk eftir nýggjár, og liðið vann sjey av teimum seinastu átta landskappingardystunum.

Einasti føroyski leikarin, sum ikki spældi við einum føroyameistaraliði, sum vann heiðursløn, var Jakobina Joensen úr KÍF. Jakobina varð kosin ársins verjuleikari.

Aftrat hesum fekk argentiski úrmælingurin hjá TB-kvinnum, Ariana Pereya Gonzalez, heitið sum besti blokkleikari, og ukrainski hevarin í ÍF, Oleksandr Dmytriiev, varð kosin ársins hevari hjá monnum.

Heitið ársins dómari fekk Sune Juul Pedersen. 

Tað eru venjarar og liðskiparar á liðunum í Føroya Tele-deildunum , sum atkvøða til hesar útnevningarnar.

Allur listin við Ársins leikarum var hesin:

Ársins leikari, kvinnur:
Svetlana Shvanskaya – SÍ 

Ársins leikari, menn:
Cristian Imhoff – Mjølnir 

Ársins álopsleikari, kvinnur:
Svetlana Shvanskaya – SÍ  

Ársins álopsleikari – menn:
Cristian Imhoff – Mjølnir 

Ársins blokkleikari, kvinnur:
Ariana Pereya Gonzalez – TB  

Ársins blokkleikari, menn:
Jóhan Arni Elisson Wang – Mjølnir          

Ársins hevari, kvinnur:
Janna Falkvard – SÍ  

Ársins hevari, menn:
Oleksandr Dmytriiev - ÍF  

Ársins verjuleikari, kvinnur:
Jakobina Joensen – KÍF  

Ársins verjuleikari, menn:
Silas Poulsen – SÍ            

Ársins stjørnuskot, kvinnur:
Sofía Weihe Simonsen – SÍ   

Ársins stjørnuskot, menn:
Ólavur Johannesen – Mjølnir  

Ársins venjari hjá kvinnum:
Ragnar í Haraldstovu – Mjølnir 

Ársins venjari hjá monnum:
Rajko Petrovic – SÍ 

Ársins lið
Fyri fyrstu ferð var eisini Ársins lið valt. Tað eru venjararnir í Føroya Tele-deildunum, sum velja.

Ársins lið hjá kvinnum:
Kantar: Svetlana Shvanskaya (SÍ) og Birgit Guttesen (Ternan) 
Miðleikarar: Ariana Pereyra Gonzalez (TB) og Sara Hasku (SÍ) 
Hevari: Janna Falkvard (SÍ) 
Diagnonalur: Sofía Weihe Simonsen (SÍ) 
Libero: Jakobina Joensen (KÍF)

Ársins lið hjá monnum:
Kantar: Bjarni Joensen (SÍ) og Mileta Vesovic (SÍ) 
Miðleikarar: Jóhan Arni Elisson Wang (Mjølnir) og Tóki í Haraldstovu (SÍ) 
Hevari: Oleksandr Dmytriiev (ÍF) 
Diagonalur: Cristian Imhoff (Mjølnir) 
Libero: Silas Poulsen ( SÍ)

Gullnál frá ÍSF
Á hátíðarhaldinum, sum var hildið í hølunum hjá Føroya Tele, fekk Magnus Tausen, fyrrverandi formaður, serligan heiður frá Flogbóltssambandinum fyri drúgva og trúgva tænastu sum formaður í eini 20 ár.  

Og Niclas Joensen, sum hevur sitið í nevndini í Flogbóltssambandinum í eini 40 ár, fekk gullnál frá Ítróttasambandi Føroya fyri sítt virki flogbóltinum at frama – og ítrótt sum heild.