Fótbóltur

B36: Bíða eftir koronaúrslitum í hitanum

Hópurin er enn einaferð kannaður fyri korona, men fær fyribils fyrireikað seg í góðu umstøðunum á gistingarhúsinum á Gibraltar.

Møguleiki er at vera úti á terassuni (Mynd: Fótbóltsfelagið B36)

2020-08-18 13:17

Agnar Prestá

Hetta er tann fyrsta evropeiska vikan hjá føroysku liðunum í ár. Einasta hópurin sum er farin út um landoddarnar higartil, HB fer til Belfast í morginárini, er B36.

Í gjármorgunin varð kósin sett ímóti Gibraltar, har B36, eins og í 2018, skal spæla ímóti St Joseph's.

Síðani ein koronatilburður varð staðfestur í leiðarahópinum hjá B36 fyri viku síðani, eru øll sum eru við í ferðalagnum kannaði tríggjar ferðir, og har hava allar kanningarnar tíbetur verið negativar.

Eftir reglunum skuldi hópurin tó aftur kannast, tá komið var til Gibraltar. Hópurin varð kannaður á hotellinum í gjárkvøldið, og til úrslitini fyriliggja sleppur hópurin ikki av hotellinum.

Teir í B36-hópinum venja inni á gistingarhúsinum (Mynd: B36)

Hetta skrivar B36 á facebook-síðu sínari. Tíbetur ber væl til at venja í venjingarmiðstøðini á gistingarhúsinum og til ber at verða uttanfyri, á matrikklinum hjá gistingarhúsinum:

- Har eru góðar umstøður at venja í og at venja seg við nógva hitan, sum í løtuni liggur á 29 stigum

B36 og St Joseph's spæla hósdagin klokkan 16.30 á Victoria Stadium.

Mynd: B36

Vinarliga broyt tínar kennifíla - og privatlívsstillingar fyri at síggja hetta innihald