B68 gjørdi bart í Gundadali

Tveir teir fyrstu dystirnir í fjórðseinasta umfari í Betrideildini hjá monnum eru spældir í kvøld.

Í Sørvági var AB á vitjan. Gestirnir høvdu harðliga tørv á stigum men fingu einki. Sørvingurin Oddur í Haraldsstovu Petersen skoraði bæði málini í fyrra hálvleiki. 22-ára gamli álopskendi spælarin hevur nú skorað seks mál í ár, og 07 Vestur byggir á sítt søguliga høga stigatal. Samstundis er hetta góð upptakt til spennandi hálvfinaluna móti HB mikukvøldið.

Brian Jakobsen minkaði um munin í 2. hálvleiki, men AB er framvegis í stórum trupulleikum í botninum. Bert trý umfør eru nú eftir til at yvirhála bæði ÍF og TB, og KÍ er á skránni næsta sunnudag.

Adrian Justinussen var við í tveimum málum hjá HB. men hetta var ikki nóg mikið. Nú skulu nummar sjey og hinir hjá HB hugsavna seg um hálvfinaluna í steypakappingini móti 07 Vestur mikudagin (Savnsmynd: Sverri Egholm)

Í Gundadali legði heimaliðið út sum eitt óløgi. Eftir 20 minuttir var 2-0 til HB, og so sá út til, at liðið hjá Jákup Martini Joensen fór at leggja seg væl og virðiliga á 3. plássið. HB fór gamaní eitt stig frammum Víking í kvøld, men talan varð ikki um nøgdsemi í HB-leguni í kvøld.

Tveir fyrrverandi B36-spælarar stóðu fyri 1-2 málinum, og í yvirtíðini í fyrra hálvleiki sló Jørgen Nielsen til. HB fekk rist skelkin av sær í steðginum, og í 55. minutti skoraði Matthias Præst Nielsen til 3-2. Tað var tó B68-liðformaðurin, Aleksandur Jensen, ið fekk seinasta orðið í undirhaldandi dystinum. Horna frá Alex Mellemgaard, stútari og eitt stig til B68.

Stórbjarging frá Tórði Thomsen í 96. minutti staðfesti hetta. 3-3 og liðið hjá Jákupi á Borg hevur nú fingið stig bæði í Klaksvík og í Gundadali í seinastuni. Fíggjarliga sperda felagið hevur helst bjargað sær sætinum í Betrideildini og skal helst spæla steypafinalu 4. november.

Spurningurin er so, um HB skal tað. Tað er 1-1 eftir fyrru hálvfinaluna, og 07 Vestur vitjar til brak mikukvøldið 3. oktober. Teitur Matras Gestsson verjir helst ikki HB-málið tá. Hann noyddist út í 63. minutti í dag vegna lærið, sum hevur givið honum trupulleikar í ár. Víkingur kann yvirhála HB aftur í morgin - evropeiska plássið er langt frá tryggjað enn.

24. umfar

Í dag, leygardagin 30. september

07 Vestur - AB 2-1 (2-0)
20' Oddur í Haraldstovu í Petersen (Mathias Voss) 1-0
31' Oddur í Haraldstovu í Petersen (Jasper van der Heyden) 2-0
66' Brian Jakobsen (Marius Kryger Lindh) 2-1

Sí uppstillingar og annað her

HB - B68 3-3 (2-2)
3' Adrian Rúnason Justinussen (Heri Hjalt Mohr) 1-0
21' Mikkel Dahl (Dan í Soylu) 2-0
32' Ragnar Samuelsen (Alex Mellemgaard) 2-1
45 (+1)' Jørgen Nielsen 2-2
55' Matthias Præst Nielsen (Adrian Rúnason Justinussen) 3-2
90' Aleksandur Ólavsson Jensen (Alex Mellemgaard) 3-3

Í morgin, sunnudagin 1. oktober
KÍ - ÍF 
TB - EB/Streymur
Víkingur - B36

Allir dystirnir byrja klokkan 15

Støðan:

1. KÍ 62 stig (23 dystir)
2. B36 53 stig (23 dystir)
3. HB 49 stig (24 dystir)
4. Víkingur 48 stig (23 dystir)
5. 07 Vestur 37 stig (24 dystir)
6. EB/Streymur 21 stig (23 dystir)
7. B68 21 stig (24 dystir)
8. TB 16 stig (23 dystir)
9. ÍF 15 stig (23 dystir)
10. AB 13 stig (24 dystir)