Agnar Prestá
B68 er í niðurflytingarstríðnum í Betrideildini. Fyri stuttum varð greitt, at Boubacar Dabo er givin í felagnum, og áðrenn flytingarvindeygað lat aftur, varð leikaraloyvið hjá Jónasi Warner fyribils flutt aftur til Sands.
Ungi sandingurin var profilur á besta liðnum hjá barndómsfelagnum í serliga 2021 og 2022, tá B71 var nær við at flyta upp. Miðvallarin skifti í vetur til B68 í Betrideildini, og hann hevur spælt í næstan øllum dystunum hjá liðnum í ár.
Í seinnu hálvu fer 21-ára gamli Jónas Warner aftur at spæla í 1. deild við B71. Hetta váttaði felagið á Facebook-síðu sínari í gjár:
- Jónas Warner er B71ari aftur í seinnu hálvu av 2023. Ungi heimasandsmaðurin hevur higartil í ár leikt við B68, men tað sum eftir er av kappingarárinum, er hann leigaður aftur til okkum og leikar tí í gulum og bláum næstu tíðina.
Tað eru serliga arbeiðumstøðurnar hjá Jónasi, ið liggja aftanfyri skifti. Hetta greiddi hann heimasíðuni bolt.fo frá í síðstu viku.
- Eg havi arbeitt á Strondum síðstu mánaðirnar og tí passaði tað væl til at spæla við B68. Men nú fari eg at arbeiða á Sandi og tað verður ov strævið at ferðast ímillum.
B71 liggur nummar 7 í 1. deild við 18 stigum fyri 15 dystir og fær nú munagóðan styrk. Jónas Warner hevur eisini sáttmála við B68 í 2024. Hann var í U21-landsliðshópinum í síðsta mánaða.
Keldur: bolt.fo og FaroeSoccer
Vinarliga broyt tínar kennifíla - og privatlívsstillingar fyri at síggja hetta innihald