Fótbóltur

Bartal Páll Klein fer aftur til B36

Sum vit skrivaðu fríggjadagin, so skiftir 19-ára gamli áleyparin úr HB. Partarnir hava gjørt trý-ára sáttmála. - Bartal Páll er millum teir mest spennandi ungu spælararnir í Føroyum.

- Vit vita, at Bartal Páll er ein spælari í stórari menning, ið eisini tørvar tíð og tol at búnast. Og tær tryggu umstøðurnar fær hann í B36, sigur Jákup á Borg, ítróttarstjóri

2026-02-05 13:18

Agnar Prestá

Bartal Páll Klein flytur nú aftur til B36 at spæla. Hann hevur skrivað undir trý ára sáttmála, sum er galdandi fram til kappingarlok í 2028.

Hesum hevur B36 boðað frá á Facebook-síðu sínari.

Áleyparin hevði annars sáttmála við HB í síðstu viku, men fríggjadagin varð samstarvið millum partarnar slitið.

Sum vit skrivaðu longu tá, bendi tað mesta á, at Bartal Páll fór at enda í B36 aftur. Hetta er nú staðfest

Les eisini: Bartal Páll Klein og HB enda samstarvið - endar eftir øllum at døma í B36

19 ára gamli framherjin spældi nøkur ár í B36 sum ungdómsspælari. Blaðungur hevði hann eisini spælt nakrar dystir fyri næsta lið, áðrenn hann fór inn á Toftir at royna seg á sumri í 2023.

Hetta var, tá Jákup á Borg var venjari í B68. Nú er Jákup ítróttarstjóri í B36 og heldur hann, at Bartal Páll fer at gera mun beinanvegin - hetta er tó eisini ein íløga í framtíðina.

- Bartal Páll er millum teir mest spennandi ungu spælararnir í Føroyum, og við sínum sjáldsama góða máltevi hevur hann longu víst seg fram í bestu deildini. Vit vita, at Bartal Páll er ein spælari í stórari menning, ið eisini tørvar tíð og tol at búnast, og tær tryggu umstøðurnar fær hann í B36, sigur Jákup á Borg við síðuna hjá B36.

Bartal Páll Klein í dystinum móti NSÍ á seinasta lekdegi í 2024, tá hann gjørdi hattrikk (Mynd: Sverri Egholm)

Bartal Páll Klein hevði 19 ára føðingardag í desember, men hevur longu lutfalsliga nógvar royndir í bestu deildini. Hann hevur spælt 60 dystir fyri B68 og HB í fremstu røð, steypakappingini íroknað, og skotið 9 mál, sambært FaroeSoccer. Harímillum er eitt hattrikk í avgerandi dystinum í 2024 - fyri at sleppa undan niðurflyting.

- Eg havi valt at skriva undir trý ára sáttmála, tí eg trúgvi upp á projektið hjá venjaranum og felagnum. Somuleiðis veit eg, at hetta er eitt gott stað, har eg kann menna meg persónliga og sum fótbóltsspælari, sigur hann. Eg vóni og vænti, at vit fara í ár at kappast í oddinum, og saman fara vit at røkka teimum málsetningunum, ið eru settir fyri kappingarárið, sigur Bartal Páll.

Sí eisini: Leivur Guttesen er nú B36'ari

Vinarliga broyt tínar kennifíla - og privatlívsstillingar fyri at síggja hetta innihald