Bartal tók metið hjá Líggjasi

Fríggjadagin setti Bartal Erlingsson Eidesgaard úr Havnar Svimjifelag tvey føroysk met í Swim Open Tórshavn, og leygardagin setti hann enn enn eitt met.

Bartal svam seg í gjár til eitt nýtt føroyskt met í 100 metrar frí við tíðini 51.50.

Undanfarna metið á 51.68 átti Líggjas Joensen. Tað metið er frá Danish Open 18. apríl.

Talan var yvirhøvur um eina skjóta finalu í gjár, tí Ísak Brisenfeldt úr Havnar Svimjifelag , sum vann silvur við tíðini 51.73, og Bárður Ólavsson úr svimjifelagnum Ægir, sum vann bronsu, settu persónligt met, skrivar Svimjisamband Føroya.

Fríggjadagin setti Bartal met í 50 metra frí við tíðini 23.46 og 50 metra bringu við tíðini 28.81.