Bayern á veg móti enn einum meistaraheiti

Dortmund hevði møguleikan at nærkast Bayern München í oddinum, tá liðini (nummar tvey og eitt) hittust í 28. umfari í Bundesligani í gjárkvøldið. 

Tað eydnaðist tó ikki, og við 1-0 sigrinum er Bayern nú sjey stig frammanfyri Dortmund. Liðið úr Suðurtýsklandi, sum hevur vunnið bestu týsku deildina sjey ár á rað, er harvið greitt oddalið og hevur tíggju stig niður til RB Leipzig, ið kann minka um munin í kvøld.

Dysturin var tættur, og einsamalla málið kom beint fyri hálvleik. Tað var Joshua Kimmich, ið sló til beint fyri stegðin, tá hann hegnisliga lyfti bóltin uppum Roman Burki stutt uttanfyri brotsteigin.


(Mynd: EPA)

(Mynd: EPA)

Erling Braut Haaland var á vøllinum í 70 minuttir, áðrenn hann noyddist út við snuddi. Heimaliðið vildi hava brotsspark í støðu, har skot hjá norðmanninum kom á armin hjá Jerome Boateng, ið kastaði seg fyri. 

Haaland fekk einki mál í stórdystinum í gjár (Mynd: EPA)