Betrideildin og 1. deild: Avgerandi dystir verða spældir seinnapartin

Upprunaliga skuldu báðir dystirnir verið leiktir leygardagin 30. november, men koronutilburðir og sóttarhald hjá B36 og B71 løgdu meinbogar fyri hesum. 

Fótbóltssambandið avgjørdi síðani, at dystirnir skuldu avgreiðast í dag - nakað sum ónøgd hevur verið um á ymsan hátt í legunum - og orsakað av nýggju tilmælunum, sum komu í vikuni, so verða ikki áskoðarar ikki til dystirnar.

Les eisini:
FSF: Spæla uttan áskoðarar
NSÍ: Eingir áskoðarar til dystin sunnudagin - um tilmælini verða fylgd
Koronuavmarkingar fara at seta sín dám á seinastu dystirnar

Inni í Dal á Sandi verða ikki áskoðarar kring vøllin til dystin, ið byrjar klokkan 16, og sum er tann størsti hjá felagnum í tíggju ár - tó kunnu fólk sita í bili og hyggja, boðar B71 frá á facebook-síðu sínari. Síðani 2012 hevur besta liðið hjá sandoyingum spælt í næstbestu deildini. Um tilveran í 2022 skal verða í Betrideildini, so krevst ein sigur móti AB. Um hetta skal eydnast, so krevst helst, at Clayton Soares do Nascimento aftur slær til. 42-ára gamli brasliumaðurin hevur verið í Føroyum meginpartin av seinastu tjúgu árinum og er toppskjútti í 1. deildí ár við tjúgu málum. 19-ára gamli lokali miðvallarin, Jonas Warner, er eisini ein av teimum, ið veruliga hevur gjørt mun í ár. Nakrir av leikarunum hjá B71 hava seinastu tíðina verið í sóttarhaldi.

Argjamenn fluttu niður í fjør eftir upp- og niðurflytingardyst móti B68, og hóast byrjanin í ár ikki var góð, so er AB nú í einari støðu undan seinasta umfarinum, at ein javnleikur er nóg mikið til at koma upp í Betrideildini. Hetta kemst serliga av góða tíðarskeiðnum eftir summarstegðin. Teir donsku leikararnir, ið komu tá - serliga Mads Zaar og Ardit Murati - hava gjørt mun, og sandingurin Símin Hansen hevur skorað 14 mál eftir summarstegðin. Hetta hevur verið fyrsti árið hjá AB í 1. deild síðani 2017.

Líkamikið hvør vinnur, ella um tað endar við javnleiki í dag, so verður tað fyrstu ferð síðani 2016 at tvey lið flyta beinleiðis upp í Betrideildina. Skála hevur vunnið deildina, og AB ella B71 enda á 3. plássi. B71 vann 2-0, tá liðini hittust á Sandi 24. apríl, og tað endaði við 1-1 javnleiki tríggjar vikur seinni á Argjum.


Á Sandi skulu AB og B71 stríðast um uppflytingarplássi. Símin Hansen, ið hevur sín uppruna í B71 hevur skorað 16 mál fyri AB, ið bert tørvar ein javnleik. B71 skal vinna fyri at enda eitt tíggju-ára skeið uttanfyri bestu deildina (Mynd: B71/Olena Goffe)

Endurtøka av í fjør

7. november 2020. 27. umfar í Betrideildini. NSÍ fer til Havnar og skal hava minst eitt stig móti B36 fyri at tryggja sær evropeiskt pláss sjeynda árið á rað. B36, ið spældi seg víðari í Evropa League tríggjar ferðir í august-september, skuldi vinna fyri at tryggja sær evropeiska luttøku áttanda árið á rað. NSÍ vann 4-3 í undirhaldandi dysti, har Klæmint Andrasson Olsen gjørdi hattrikk. Kravið hjá B36 var síðani at vinna steypakappingina fyri at taka evropeiska plássið frá KÍ, sum datt niður á 3. pláss, men tað eydnaðist ikki.

Nú, júst eitt ár seinni, er støðan ógvuliga lík henni í fjør. Hesuferð eru fýra evropeisk pláss, men Víkingur hevur stungið seg frammum NSÍ og B36. Hesuferð verður leikt við Løkin - og uttan áskoðarar - og tað er B36, ið hevur nóg mikið við javnleiki, meðan NSÍ skal vinna. NSÍ vann 4-2, tá liðini hittust við Løkin mitt í apríl - fyrst í augst spældu tey 1-1 javnleik í Gundadali. 2-0 sigurin hjá B36 á Víkingi í útsetta dystinum hóskvøldið, ið lyfti liðið uppum NSÍ, var tann fyrsti hjá havnarliðnum á øðrum topp-fimm liðið í ár. Tá vóru Andrias Eriksen, Benjamin Heineseini Mathias Trane og Uros Stojanov ikki við frá byrjan - fyrst- og síðstnenvdi ikki á vøllinum. Sebastian Pingel fór av vøllinum við skaða.

Liðið, sum endar á fimtaplássi, hevur enn ein møguleika at røkka evropeiskum plássi. Tað er við at vinna steypakappingina. Í so fall endar liðið, sum endar nummar fýra, uttanfyri. Televarpið vísir hendan týdningarmikla dystin, sum byrjar klokkan 16, og tann á Sandi. FM1 hevur eisini beinleiðis frásøgn. Til ber at fylgja gongdini á forsíðu okkara og vit hava myndir og samanumtøku frá dystunum



1. deild menn, 27.umfar

Betrideildin menn, 27. umfar

Tøl: Faroesoccer