Brandur skorað sítt fyrsta mál í Helsingborg

Helsingborgs hevur seinastu dagarnar leikt tveir venjingardystir. Tann fyrri var mikudagin í Odense, har Brandur kom á vøllin í 2. hálvleiki í 3-1 ósigrinum á OB. Í gjár var eitt annað Superliga-lið á skránni. Lyngby vitjaði í Skåne, og spælt varð á Filborna idrottsplats. 

Brandur Hendriksson, við fimm-talinum á rygginum, var hesaferð í byrjanaruppstillingini. Miðvallarin rann seg í 12. minutti í góða støðu, setti fótin á innlegg frá Adam Ericksson, og so var 1-0. 

(Brandur spældi við fimm-talinum - Mynd: hif.se)

Føroyingurin segði í videosamrøðu við almennu Helsingborgs IF-síðuna, at spælið var gott fyrsta hálva tíman. Hann lat eisini sera væl at móttøkuni, ið hann hevur fingið í hópinum -  sí samrøðuna omanfyri.

Lyngby-áleyparin, Emil Nielsen, gjørdi hattrick í 1. hálvleiki. Heimaliðið minkaði um munin í 89. minutti. Tá var Brandur útskiftur - Helsingborgs gjørdi nógvar útskiftingar og spældi við einum ungum liðið í 2. hálvleiki. 

Nýggja felagið hjá Brandi Hendrikssyni Olsen skal komandi tveir mánðirnar halda fram at fyrireika seg til Allsvenskan, ið byrjar fyrst í mars. Fleiri venjingardystir móti øðrum svenskum liðum eru settir á skrá.