Agnar Prestá
Í gjár lat Manchester United venjingarmiðstøðina Carrington aftur, orsakað av nøkrum staðfestum kornutilburðum í kanningum sunnudagin. Nakrir leikarar og nakrir í venjaratoyminum eru smittaðir, og felagið sendi í gjár Premier League umbøn um at útsetta dystin.
Hendan umbønin varð gingin á møti seint í gjárkvøldið, og við tí tøttu jóla- og nýggjársskránni so er greitt, at liðini ikki spæla hendan dystin í 17. umfari fyrrenn í 2022.
Dysturin millum Brighton og Tottenham, sum skuldi verða leiktir sunnudagin, varð eisini útsettur orsakað av koronutilburðum í hópunum - serliga hjá Tottenham - og hetta fordømi varð tikið við, tá Premier League tók avgerðina um Brentford-Manchester United dystin.
Sky Sports skrivar, at met er sett hesa júst farnu vikuna, hvat koronutilburðum viðvíkur í samband við Premier League; leikarar, venjaratoymi o.s.fr. 42 útav 3,805 kanningum vóru positivar, og vaksandi talið av tilburðum kann ávirka kappingina næstu tíðina - millum annað við fleiri útsettum dystum og møguliga færri áskoðarum.
Tveir dystir verða leiktir í Premier League í kvøld. Norwich tekur ímóti Aston Villa - 19.45 - og fimtan minuttir seinni verður bríkslað í gongd í Manchester, har oddaliðið tekur ímóti Leeds.
Vinarliga broyt tínar kennifíla - og privatlívsstillingar fyri at síggja hetta innihald