Djóni Nolsøe Joensen íðkaði við 4. flokki í Vágs skúla

Hósdagin hevði Vágs skúli vitjan av landsstýrismanninum í barna- og útbúgvinarmálum, ið var á rundferð í Suðuroynni, skrivar skúlin í tíðindaskrivi.

Djóni Nolsøe Joensen hevur seinastu mánaðirnar fylgt væl við einari phd-verkætlan hjá Helga Winther Olsen á Námsvísindadeildini um virknaðin, sum rørsla hevur fyri likamligu og sálarligu heilsuna hjá børnum, og tí valdi hann at vitja og luttaka í rørslutímanum saman við 4. flokki.

Talan er um eitt samstarv millum Fróðskaparsetur Føroya, Fólkaheilsuráðið og Vágs skúla.

Sambært Barna- og útbúgvingarmálaráðnum hava øll børn í Vágs skúla í tíggju vikur luttikið í Fit First rørsluvenjingunum, har tey hava havt rørslu tríggjar ferðir um vikuna umframt vanligu ítróttatímarnar.

Øll børnini í Tvøroyrar skúla hava eisini luttikið í granskingarverkætlanini, men sum kontrolbólkur fyri at máta virknaðin, um børnini ikki hava hesa rørsluvenjingina.

Eftir rørslutíman setti landsstýrismaðurin og starsvfólk úr barna- og útbúgvingarráðnum, næmingum og lærarum spurningar um átakið. 

Tá landsstýrismaðurin hevði fingið sær eitt brúsubað eftir lidna venjing og spurnartíma, var upplegg frá lærararunum, ið eru knýttir at rørsluverkætlanini um tilgongdina, tilfarið, royndir og eisini "ringar í vatninum”, sum tey orðaðu seg.

Á middegi var døgurðasteðgur, og so var fundur millum leiðslunar í Tvøroyar og Vágs skúla, Fróðskaparsetur Føroyar, Fólkaheilsuráðið og landsstýrismannin í barna- og útbúgvingarmálum, og embætisfólk hansara, um hvussu henda rørsluverkætlan kann halda áfram og møguliga eisini breiðast út til fleiri skúlar í Føroyum.