EB/Streymur hevur sett høvuðsungdómsvenjara og venjara til 1. deild

EB/Streymur hevur í vikuni kunngjørt tveir venjarar til kappingarárið 2023 - annan til næstbesta liðið og hin sum høvuðsungdómsvenjara.

- Sum liður í at menna ungdómsarbeiðið í felagnum, so hava vit í kvøld gjørt tvey ára sáttmála við Eliesar Olsen, sum kemur at verða høvuðsungdómsvenjari. Eliesar hevur verið í EB/Streymi fyrr, er búsitandi á Eiði og hevur børn í felagnum.

Hetta skrivaði EB/Streymur á Facebook-síðu sínari í gjárkvøldið.

33-ára gamli skálamaðurin var í 2015 høvuðsvenjari hjá besta mansliðið felagsins og var framanundan tí oddamaður á Skála, tá eitt ungt Skála-lið flutti uppaftur í bestu deildina í 2013. Seinastu tvey árini hevur Eliesar verið høvuðsungdómsvenjari hjá júst Skála, og hann var eisini hjálparvenjari hjá besta mansliðnum í Runavík í 2017, har úrslitið millum annað var eitt steypagull.

Sostattt hevur Eliesar Olsen, hóast sín lutfalsliga unga aldur, nógvar venjararoyndir, og hann hevur eisini UEFA A-venjaraprógv og lesur hann í løtuni til lærarar, skrivar EB/Streymur.


Jan Dam heldur fram sum venjari hjá næstbesta manslandsliðnum - her saman við formanni felagsins (Mynd: EB/Streymur)

Fyrr í vikuni kundu tey í EB/Streymi eisini fegnast um, at Jan Dam hevur tikið avgerð um at leingja samstarvið við felagið.

- Jan kom til felagið við kappingarbyrjan í 2021 og fer tí undir triðja árið sum venjari á næstbesta liði felagsins. Komandi ár skal liðið leika í 1. deild, og tað verður við Jan við róðrið, at okkara leikarar skulu stríðast fyri at halda sær í deildini.

54-ára gamli havnarmaðurin og lið hansara eru fluttir upp úr 2. deild, og nú skal næsta stigið takast.