Ein nýggj stór avbjóðing

Opatija, Kroatia (Portalurin) - Leygarkvøldið feldu Føroyar Svøríki í avgerandi dystinum í bólkaspælinum. Nú seinnapartin er fyrsti dysturin í HM-meginumfarinum á skránni, og talan er um enn eitt mótstøðulið, sum er ein evropeiskur hondbóltsrisi.

Svøríki endaði við silvurheiðursmerkjum til HM-endaspælið í fjør, og Týskland fekk bronsu. Tað er ein hugsan um, at týskararnir helst eru líka sterkari enn sviar beint nú. Týskland vann allar dystirnar í sínum bólki sannførandi.

Óli Mittún og hinir eru greiðir yvir, at talan verður um sera sterka mótsstøðu. Tó vita teir í føroysku leguni eisini, at um man fær loyst nøkur ting heilt væl og rakt dagin rætt, so ber hetta eisini til.

Sí eisini: Óli Mittún: - Vit hava hundrað prosent ein møguleika

Óli Mittún gjørdi bart móti Svøríki - serliga við 17 málum. Hoyvíkingurin skal aftur vísa høgt stig seinnapartin (Mynd: Egin Tollaksson Kass)


Mongu føroysku áskoðarnir gjørdu sanniliga eisini sítt móti Svøríki og fara helst at hoyrast væl og virðiliga í dag eisini  (Mynd: Egin Tollaksson Kass)

Av tí at Føroyar ikki fingu nakað stig við sær til meginumfarið - vegna tapið fyri Iran - so er ein sigur á Týsklandi næstan eitt krav. Annars skal hjálp til frá Saudiarbaia, sum spælir móti Iran í kvøld.

Spælararnir hava síðani Svøríki-dystin fingið armarnar niður aftur, hava hvílt og so hava venjararnir eisini fyrireika ungu menninir uppá, hvat teir nú eru uppi ímóti, og hvat skal fremjast í dag. Lagið tykist vera heilt gott, og huglagið rímiliga "lætt" - hetta vísir videobrotið beint niðanfyri eisini.

Sí eisini: 
Video: Danskur stílur og krúllikrem - sløvir og skemtiligir menn
Myndir: Nærkast av álvara til brakið móti Týsklandi

Dysturin í dag byrjar 16 og kann stroymast her. Portalurin verður eisini til staðar og hevur ymiskt tilfar.

Djóni Gaard Joensen og Hjalti Mohr Jacobsen hava nú roynt at fyrireika ungu menninir uppá uppgávuna móti Týsklandi  (Myndir: Egin Tollaksson Kass)

Meginumfar - Bólkur IV í Opatija

Í dag Mánadagin, 7. august
16:00 Týskland - Føroyar
18:00 Iran - Saudiarabia

Týsdagin, 8. august
16:00 Saudiarabia - Føroyar
18:00 Týskland - Iran

Allar tíðir eru føroyskar 

Støðan - eftir hvørji stig liðini hava við:
Týskland 2 stig
Iran 2 stig
Føroyar 0 stig
Saudiarabia 0 stig

Tvey tey ovastu liðini eftir næstu tveir dystirnar fara til fjórðingsfinalurnar - hini skulu spæla um 9-16 plássini.