Einir 6000 áskoðarar í Gundadali í gjár

Longu ein tíma undan dystinum var at kalla fult í bygdaskýlinum, B36-húsinum og í HB-húsinum. Sera stórur áhugi at síggja sonevndu “FM-finaluna” millum B36 og KÍ, sum var avgerandi fyri um meistaraheitið skuldi til Havnar ella til Klaksvíkar.

B36, sum hevði heimavøll og fekk allar inntøkurnar frá dystinum sigur nú, at eini 6000 fólk vóru til staðar í Gundadali í gjár. Helst er alt ikki talan um gjaldandi áskoðarar, men hóast tað man hetta teljast millum størstu áskoðarafjøld sum hevur verið í Føroyum.

Undan dystinum leitaði heimasíðan bolt.fo ymisk tøl fram. Til FM-finalu millum HB-KÍ í 1972 vóru 3450 gjaldandi áskoðarar. Í finaluni um løgmanssteypið í 2016 millum Víking og KÍ vóru 4652 gjaldandi áskoðarar.

KÍ vann sum kunnugt dystin 3-0 og tryggjaði sær harvið meistaraheitið 2019. Hetta var fyrstu ferð í 20 ár, at KÍ vinnur Føroyameistaraheitið.

Hoyr og síggj gullprát við glaðar KÍ-leikarar