Ingi Samuelsen
Italiumaðurin Enzo Maresca er ikki longur venjari, manager, í Premier League-felagnum Chelsea. Hetta hendir eftir fleiri vánalig úrslit í seinastuni.
Felagið hevur váttað tíðindini.
Avgerðin er komin eftir fleiri dagar, har bretskir miðlar hava viðgjørt framtíðina hjá Maresca. Tað verður sagt, at lagið á Stamford Bridge (heimavøllinum hjá Chelsea, -red.) ikki hevur verið nakað serligt hesar seinastu dagarnar.
Chelsea fekk einans 2-2 heima móti Bournemouth í seinasta dystinum í 2025. Úrtøkan hesi seinastu sjey umførini er einans ein sigur. Vánaligu úrslitini hava nú kostað Enzo Maresca starvið.
Chelsea liggur í løtuni á fimta plássi í Premier League við 30 stigum fyri 19 dystir.
Millum sigrarnar hjá Chelsea við Maresca sum manager er finalusigurin í Conference League í summar, tá Chelsea í finaluni vann 4-1 á Real Betis. Harvið gjørdist Chelsea fyrsta felagið, sum hevur vunnið allar tríggjar núverandi kappingarnar undir Uefa, Champions Leauge, Europa League og Conference League.
Vinarliga broyt tínar kennifíla - og privatlívsstillingar fyri at síggja hetta innihald