Ingi Samuelsen
Boksifelagið Tórshavn Boksing, sum heldur til í leigaðum hølum á Hjalla, flytir í dag ein av boksiringunum oman á Torgið í SMS, har skipað verður fyri sýningardystum fyri tey vitjandi í keypsskálanum.
Tórshavn Boksing er eitt felag, sum støðugt má út at finna pening til at fíggja nógv vaksandi virksemið í felagnum. Serliga eru tað leiguútreiðslurnar fyri felagshølini, sum tyngja.
Tí skipar felagið leygardagin fyri tombola í SMS, og eisini verður søla av t-troygjum og hettutroyggjum við búmerkinum hjá felagnum á.
Men tað týdningarmesta er at at vísa ítróttina fram og greiða frá um boksing, og eisini geva føroyingum møguleika at heilsa upp á dreingirnar, sum júst hava vunnið heiðursmerki í donsku sælandsmeistarakappingini, David Kunoy og Hera Ziskason.
Fýra sýningardystir eru á skránni. Tveir verður millum lokalar boksarar. Jonathan móti Teiti Annand og David Kunoy móti Magna Vang. Tveir dystir vera millum Tórshavn og Klaksvík: Karstin Ljósstein móti Leivi Fonn og Heri Ziskason móti Róki Fonn.
Tiltakið í SMS er leygardagin millum klokkan 10 og 16.
Vinarliga broyt tínar kennifíla - og privatlívsstillingar fyri at síggja hetta innihald