Favorittarnir komu væl í gongd

Fyrsti dagur av EM-endaspælinum í manshondbólti er av. Tveir dystir vórðu leiktir í Trondheim í Noreg og tveir í Graz í Eysturríki. Svøríki er tann triðja vertstjóðin, og í morgin verða dystir leiktir í Scandinavium í Göteborg.

Hetta er fyrstu ferð, at 24 lond eru við í einum EM-endaspæli. Helmingin kemur víðari til millumumfarið. Tey eru deild í seks bólkar, og í mun til undanfarnar kappingar koma tvey lið víðari og ikki trý. Harvið krevst tað meira at koma víðari, og hjá favorittunum snúði tað seg um at koma væl frá byrjan í dag.

Tríggir risafavorittar vóru í kvøld. Hvítarussland var eisini favorittur móti Serbia, tó ikki so stórur sum hinir tríggir. Hvítarussland hevði leiðsluna so at siga allan dystin, og trekti frá nakað inn í 2. hálvleik so at talan gjørdist um ein tryggan sigur -  hetta hóast liðið fekk heili níggju útvísingar. Artsem Karalek var stóri leikarin við níggju málum.

Í hinum dystinum í bólki A var talan um Balkan-uppgerð. Tað er ikki langt frá Kroatia til Eysturríkis, og nógvir larmandi kroatiskir áskoðarar settu sín dám á. Á vøllinum stríddist Montenegro, ið vóru í bólki við Føroyum í undankappingini, væl og vóru á odda í steðginum. Í 2. hálvleiki var tó stórur munur, og Luka Cindric og hinir greiddu sína skyldu.

Luka Cindric skeyt sjey mál og átti sín stóra part í kroatiska sigrinum á Montenegro, ið Føroyar spældu javnleik ímóti á heysti í 2018 (Mynd: EPA)

Í bólki C vóru tað tvær stórar tjóðir og hondbóltstjóðir, ið stóðu yvirfyri londum ið vóru í einum EM-endaspæli á fyrsta sinni. Holland argaði grannarnar Týskland við at leggja seg á odda 2-0, og við at koma heilt tætt aftur hóast týskarar miðskeiðis í 1. hálvleiki vóru á odda við seks málum. Tá tað var 10-5 fekk týska stjørnan, vinstri vongurin Uwe Gensheimer, beinleiðis reytt kort, tá hann rakti málverjan í høvdið við brotskast. Eina løtu inn í 2. hálvleiki glapp ordiliga hjá týskarunum, men Holland var eitt frískt íkast, og serliga bakspælarin Kay Smits sum spælir fyri Team Tvis Holstebro. 


Kviki hálendingurin, Kay Smith, gav týsku verjuni høvuðbrýggj (Mynd: EPA)

Í 2015 tapti Lettland finaluna í Emerging Nations Championship, ið er kapping fyri lið, ið ikki eru við í undankappingum. Tá vóru Føroyar omaná. Síðani hava bæði landsliðini ment seg, og Lettland er longu komið til sítt fyrsta endaspæl. Søguligi dysturin var ímóti Spania, ið verjir evropameistaraheitið frá 2018. Lettland var á odda 3-0 og 4-1, og tað gekk ein løta til Spania fekk yvirtakið.


Tað krevur eitt sindur at handfara vinstra bakkin hjá Lettlandi, ið skoraði sjey mál í kvøld (Mynd: EPA) 

2,15 metrar høgi Dainis Kristopans var ikki lættur hjá spaniólum at hava við at gera. Tá hann einaferð bukkaði seg niður, fekk hann eina hond í andlitið, og hetta var seinna beinleiðis reyða kortið hjá Spania í kvøld. Hitt var fyri líknandi brot. Lettland kom á -2 men ikki nærri enn tað í 2. hálvleik - ov nógv mistøk vórðu framd fyri at halda spenninginum í dystinum. 

Bólkur A: 
Hvítarussland - Serbia 35-30 (16-15)
Kroatia - Montenegro 27-21 (12-13)

Bólkur C: 
Týskland - Holland 34-23 (15-13)
Spania - Lettland 33-22 (14-11)


Í morgin: 

Bólkur B: 
17.15: Kekkia - Eysturríki
19.30: Norður Makedónia - Ukraina


Bólkur D: 
17.15: Frakland - Portugal
19.30: Noreg - Bosnia & Hersegovina

Bólkur F:
17.15 Slovenia - Pólland 
19.30: Svøríki - Sveis

Leygardagin: 


Bólkur C: 
17.15: Danmark - Ísland
19.30: Russland - Ungarnd