Fimm mál – fýra sigrar

Eftir at hann royndi seg í Italia í eitt hálvt ár kom 29-ára gamli Páll Andrasson Klettskarð aftur til barndómsfelagið í juni. Eftir eina heldur trilvandi byrjan, har áleyparin millum annað skuldi heilt sleppa av við ein skaða, er Páll vorðin ein sera umráðandi faktorur í FM-stríðnum hjá KÍ.

Páll eftir NSÍ - kenslan er góð

Páll hevur fimm mál uppá 635 minuttir (0,38 í miðal) í Betrideildini í ár, og øll málini hava havt avgerandi týdning fyri KÍ:

25. august (20. umfar):
EB/Streymur – KÍ 0-1
0-1 Páll Andrasson Klettskarð

18. september (útsettur dystur í 16. umfari):
NSÍ – KÍ 0-1
0-1 Páll Andrasson Klettskarð (skiftur inn í 76. min - skorar í 83’)

8. oktober (25. umfar):
Víkingur – KÍ 1-3
1-2 Páll Andrasson Klettskarð (skiftur inn í 66. min – skorar í 74' – leggur eisini upp til Patrik Johannesen í 67. minutti)

20. oktober (26. umfar):
KÍ – NSÍ 3-2
2-1 Páll Andrasson Klettskarð
3-1 Páll Andrasson Klettskarð

Hagtøl: FaroeSoccer

Harvið hevur Páll havt beinleiðis ávirkan á hesar fýra sigrarnar. Tvær ferðir hevur áleyparin skorað einsamalla málið hjá á útivølli, tvær ferðir er hann komin inn av bonkinum og verið avgerandi, og tvær ferðir hevur Páll Klettskarð verið við at vent dystinum frá tapi til sigurs fyri KÍ.


At Páll kom á vøllin í Sarpugerði 8. oktober fekk - eins og við Løkin tríggjar vikur frammanundan - avgerandi týdning fyri KÍ (Mynd: Sverri Egholm)

Harafturat hevur arbeiðsinnsatsurin verið stórur hjá klaksvíkingunum, og tey 12 stigini ið eru komin í hesum dystunum gera, at KÍ hevur 61 stig, eins og B36, og kann tryggja sær FM leygardagin við minst einum javnleiki.