Flúgvandi føroyameistarar móti ÍF

Ivamál hevur verið um, hvussu væl fyri KÍ er til nýggja kappingarárið eftir heldur brádligt venjaraskifti í januar, nakað seinni byrjan uppá venjingar, ivasom úrslit og avrik í uppstartinum, umframt ávísar broytingar í hópinum.

Trýfaldu føroyameistararnir lótu tó ongan iva verða um í dag, at tað er stórur munur á teimum og ÍF. Fuglfirðingar eru aftur í ár millum favorittarnir at flyta niður, og liðið hjá Aleksandar Jovevic fekk so at siga ikki eitt bein til jørðina við Djúpumýru. Tað byrjaði við tveimum málum fyrstu tíggju minuttirnar, ið vóru so at siga heilt líka: Árni Frederiksberg legði hornaspark úr høgru hart og væl inn í fremsta økið, og Páll Andrasson Klettskarð stýrdi bóltinum trygt í netið.

2-0 og tað gjørdist ongantíð spenningur um útfallið, hóast ÍF kom eitt lítið sindur betri við seinni í hálvleikinum. Páll og KÍ vóru eisini í hopla, og 9'arin hjá KÍ hevði flottan fluktara, ið fór beint framvið, og eina aðra roynd á stongina.

Fleiri í bláum bjóðaðu seg eisini fram: Árni og Jóannes Danielsen sprutlaðu í høgru, Claes Kronberg noyddi Jákup Nolsøe Olsen at gera stórbjarging við skotið av brotsteigarmarkinum, men seint í 1. hálvleiki var tað ein ungur klaksvíkingur, sum økti: Jóhan Josephsen fekk møguleikan undir liðuni á Pálli, og tá Patrick Da Silva rakti stongina við langskoti, var Jóhan mest til reiðar til returbóltin. 18-ára gamli áleyparin kundi stýra bóltin í málið við høvdinum, og eins í fjør skoraði hann móti ÍF.

Árni Frederiksberg og Jóhan Josephsen fegnast saman, eftir at ungi áleyparin í fjør hevði skorað sítt fyrsta mál fyri besta liðið hjá barndómsfelagnum - eisini móti ÍF (Savsmynd: Sverri Egholm)

Mads Mikkelsen skoraði til 4-0 í 2. hálvleiki (Savnsmynd: Sverri Egholm)

3-0, og soleiðis endaði 2. hálvleikur eisini. KÍ hevði stóra yvirvág, og Mads Boe Mikkelsen økti, áðrenn Páll Klettskarð aftur slapp framat. Hann tryggjaði sær hattrikkið tjúgu minuttir fyri leiklok, tá hann var fyrstur á returbólti. Løtu seinni legði Jóannes Kalsø Danielsen ógvuliga væl inn fyri úr høgru, og Páll stútaði bóltin flott í longra málhornið til 6-0.

Hetta er annað árið á rað, at nú 33-ára gamli áleyparin byrjar Betrideildina við fýra málum, og at KÍ byrjar við stórsigri á heimavølli (7-0 móti TB í fjør) Góð byrjan hjá Haakon Lunov og hansara monnum - leygardagin verður væl størri roynd, tá KÍ vitjar B36 í Gundadali.

dystir.fo - fleiri smálutir síggjast her

Í dag, sunnudagur 10. mars
KÍ - ÍF 6-0 (3-0
 
B68 - B36 (17:00)
HB - NSÍ (18:00)
Skála ÍF - EB/Streymur (18:30)

Í gjár, leygardagin 9. mars
07 Vestur - Víkingur 0-2 (0-1)

Les eisini: 
Ongantíð veruligur ivi um stigini
Sí myndir frá dystinum