Føroyaleikir: Gongur væl við tilmeldingum til 1/2marathon í Suðuroynni

Fyrireikingarnar til Føroyaleikirnar eru í gongd, og nógv tiltøk vera í Føroyum 8.-11. juli, og her av ein stórur partur í Suðuroynni.

Í Suðuroynni er Hvistan virkin partur av hesum fyrireikingum, og nógvar fyrireikingar hava seinast tíðina verið í gongd. Eitt nú er gongutúrur í haga á skránni, umframt Kirvi Føroya Sunnasta 1/2marathon sum í ár er úr Porkeri til Vágs, síðani til Lopra og Akrar og aftur til Vágs – í alt 21,1km.

Nakrar av teimum fyrireikingum, ið eru í gongd í Suðuroynni til hesi tiltøk er, at tjald verður sett upp á havnalagnum, Jóhanna TG326 kemur at liggja beint við tjaldið og selja góðu Jóhannu búffarnar, umframt at hópin av tónleiki er fingin uppá pláss, soleiðis at øll tey luttakandi og vitjandi í Suðuroynni til Føroyaleikirnar og tiltøkini annars, kunnu hittast og hugna sær saman og fáa okkurt gott at eta.

Kirvi Føroya Sunnasta 1/2marathon hevur longu nú væl omanfyri 100 tilmeldingar, har luttakararnir bæði kunnu renna, ganga ella fyri sovítt trilla við barnavogni ella á súkklu.

Til ber framvegis at melda til, men evsta mark fyri um ein ynskir eina t-shirt er nú sunnudagin. Meira um hetta tiltakið sæst á facebookvanganum Føroya Sunnasta 1/2marathon.

Hvistan saman við Visit Vágur vónar í komandi viku at kunna um eina rúgvusmikla og áhugaverda skrá, sum tey saman við øðrum ítróttarfeløgum og áhugafeløgum í Suðuroynni nú leggja seinastu hond á.