Føroyar eru greitt oddalið í bólkinum

Føroyar kunnu hava tryggjað sær fyrsta plássið í bólki A í deild D longu eftir dystirnar, sum verða leiktir í oktober. Hetta er greitt eftir dystirnar í dag.

Føroyingar sigraðu í Andorra, og harvið vann liðið hjá Håkani Ericson fyri aðru ferð uppá fýra dagar. Eftir tveir dystir í hesari útgávuni av Nations League hava Føroyar fult stigatal, og fyri fyrstu ferð nakrantíð er føroyska A-landsliðið hjá monnum byrjað við tveimum sigrum í einari kapping, sum ikki er Oyggjaleikir. Hetta er fyrstu ferð síðani 1997, tá Føroyar við stuttum millumbili vunnu á Malta, at landsliðið hevur vunnið tveir dystir á rað í einari kapping.

Les eisini: 

Sannførandi føroyskt avrik í Andorra

Sí eisini:

Her sært tú 1-0 málið í Andorra

Video: So gott var lagið í Andorra

Tað var Klæmint Andrasson Olsen, sum hegnisliga skoraði einasta málið í dystinum í Andorra La Vella seinnapartin. Føroyar høvdu fult tamarhald á støðuni og vunnu fult uppiborið, tó at liðið ikki skapti nógvar málmøguleikar - Andorra hevði einki skot á málið hjá Teiti Gestssyni.

Hallur legði upp, og Klæmint skoraði (Mynd: Mynd: FAF / Fótbóltssambandið í Andorra)

Håkan og Eli hava fingið eina góða byrjan 

Á Malta vitjaði Lettland, og har fingu liðini eitt mál í part í 1. hálvleiki. Kyrian Nwoko legði heimaliðið á odda, tá áleyparin skoraði sítt annað landsliðsmál - tað fyrra gjørdi hann í 2-1 sigrinum á Føroyum í mars í fjør. Malta gjørdi tó seinni í hálvleikinum sjálvmál, og dysturin á Ta' Qali endaði 1-1.

Lettland og Andorra spældu 0-0 javnleik í Riga hóskvøldið, og harvið eru Føroyar higartil einasta liðið í bólkinum, sum hevur vunnið. Fýra stig eru niður til Lettland, ið er mótstøðuliðið hjá Håkani Ericson og hansara liði næstuferð. Tað er 10. oktober á Tórsvølli, og tríggjar dagar seinni er tað Andorra, ið vitjar. Vinna Føroyar  báðar dystirnar, samstundis sum Malta ikki vinnur báðar sínar tá, so er fyrsta plássið í bólkinum í hús. Fyrst skal ein venjingardystur móti Danmark tó "avgreiðast". Hann verður um ein mánað, 7. oktober, í Herning. 

UEFA Nations League deild D, bólkur A

06.09, Andorra La Vella
Andorra - Føroyar 0-1 (0-1)
31' Klæmint Andrasson Olsen (Hallur Hansson) 0-1

Ta' Qali National Stadium
Malta - Lettland 1-1 (1-1)
16' Kyrian Nwoko 1-0
26' Sjálvmál 1-1

Støðan eftir tvey umfør: 

1. Føroyar 6 stig
2. Lettland 2 stig
3. Malta 1 stig
4. Andorra 1 stig