Ingi Samuelsen
Hóast føroysku hondbóltskvinnurnar taptu í kvøld, so vóru tær kanska tær mest nøgdu eftir dystin í kvøld
Svøríki vann 31-27 – altso við fýra málum. Tað var rættiliga nógv minni enn tey flestu høvdu roknað við undan dystinum.
Føroyar hava nú eitt gott útgangsstøði undan spennandi dystinum í Hafnafirði móti Íslandi sunnudagin.
Tí tær vístu til tíðir stórt spæl í kvøld. Svensku stjørnurnar vóru stundum ráðaleysar móti teimum meira óroyndu og ókendu føroyingunum.
Nú er at vóna, at dysturin í kvøld ikki hevur tikið ov hart upp á føroysku leikararnar. Tí tær bestu vóru hart koyrdar.
Jana Mittún, Elsa Egholm, Pernille Brandenburg, Turið Arge Samuelsen og Súna Krossteig Hansen spældu so gott sum allar 60 minuttirnar. Onkur teirra fekk als onga hvíld í dag.
Men tann besti spælarin á vøllinum í dag var ein føroyingur, sum ongantíð kom fram um miðlinjuna, men sat á beinkinum hvørja ferð Føroyar vóru í álopi.
Brynja Høj vísti heimsstøði
Brynja Høj spældi ein stórdyst í verjuni – ja, á heimsstøði. Uttan iva dagsins leikari. Tað var eina og aleina hennara heiður, at sviar hóast alt “bara” fingu 31 mál í kvøld.
Jana Mittún spældi eisini ein frálíkan dyst og gjørdist føroyskur toppskorari við 8 málum.
Føroyskir málskjúttar (27-31):
Jana Mittún 8 mál
Elsa Egholm 5 mál
Súna Krossteig Hansen 4 mál
Lív Sveinbjørnsdóttir Poulsen 3 mál
Anna Elisabeth Haldóttir Weyhe 3 mál
Turið Arge Samuelsen 1 mál
Bjørk Franksdóttir Joensen 1 mál
Rannvá Olsen 1 mál
Pernille Brandenborg 1 mál
Vinarliga broyt tínar kennifíla - og privatlívsstillingar fyri at síggja hetta innihald