Agnar Prestá
Fríggjakvøldið fekk Bodø/Glimt bert javnleik á heimavøll ímóti uppflytarunum KFUM Oslo. Harvið hevði hin uppflytarin í gjár møguleika at koma undir liðuna á oddaliðnum í stigum.
Fredrikstad hevur higartil havt eitt flott kappingarár í fremstu norsku deildini. Liðið hjá Mikkjali Thomassen tapti fyrsta dystin móti meistaranum Bodø/Glimt men hevur ikki tapt síðani. Felagið hevur tikið øll á bóli og er nú ósigrað í níggju dystum. Hetta er greitt eftir málleysa javnleikin í gjár.
Farið varð sjálvandi eftir sigrinum í heimadystinum móti Tromsø, sum í løtuni er botnlið. Fyritreytirnar gjørdust verri longu eftir smáar tjúgu minuttir, tá lyklaspælarin Stian Molde fekk beinleiðis reytt kort. Hann strekti seg eftir einum bólti, og tað endaði við stempling. Fyrst fekk vongbakkurin gult kort, men eftir VAR-kanning, og stillmyndir sum fingu tað at síggja ógvusligari út, fekk Molde reytt kort. Hørð døming sum viðmerkjarar eisini vóru ósamdir í.
Støðan sæst her - umframt viðmerkingar frá Stian Molde
Heimaliðið helt tó nullið og fekk eitt stig. Brandur Hendriksson Olsen kom á vøllin í fyrra hálvleiki og spældi samanalgt 43 minuttir. Skálvíkingurin varð offraður taktiskt, tá fimm minuttir restaðu í av dystinum.
21 stig fyri 10 dystir og 2. pláss í Eliteseriuni er meira enn góðkent higartil hjá Fredrikstad, sum hevur føroyskan høvuðsvenjara og føroyskan fysiskan venjara (Elisabet Vang) Jóannes Bjartalíð er skaddur til íhvussu er summarsteðgin.
Tveir dystir resta í undan hesum steðginum. Tann fyrri er ímóti júst Tromsø - á útivølli mikukvøldið. Síðani er tað á Lerkendal móti Rosenborg næsta vikuskifti.
Vinarliga broyt tínar kennifíla - og privatlívsstillingar fyri at síggja hetta innihald