Fýra føroyingar í bestu donsku flogbóltsdeildunum

Fýra av føroysku landsliðsleikarunum í flogbólti leika nú í donsku elitudeildini fyri kvinnur og menn, sum er besta deildin í Danmark.

Súsanna Ludvíg í Brøndby VK
Ein av berandi kreftunum á føroyska kvinnulandsliðnum og føroysku meistarunum, Fleyr, Súsanna Sólrunardóttir Ludvig, er nýliga flutt til dansaka meistaraliðið Brøndby. Súsanna hevur longu víst sínar dygdir hjá donsku meistarunum, og hevur seinastu vikuna verið vald sum miðja á vikuliga dream team fyri kvinnur.

Hóast Brøndby gjørdust meistarar í 2021/2022 hevur byrjanin á kappingina ikki verið góð. Liðið er nú styrkt við m.a. Súsonnu og í dag vann Brøndby sannførandi  3-0 móti DHV Odense, og aftur leikti Súsanna ein góðan dyst.

Hanna Biskupstø í Ikast KFUM
Hanna Iansdóttir Biskupstø, flutti eftir summarsteðgin frá føroysku meistarunum, Fleyr, til Ikast KFUM. Hann var hevari hjá Fleyr og føroyska landsliðnum, sum kappaðist í Eurovolley undankappingini í summar. Hann hevur áður verið í Ikast KFUM og er nú komin aftur á kendar leiðir.

Hanna hevur gjørt tað væl, síðani byrjan í Ikast og liggur nýggja felagið hjá Honnu nr. 5 í donsku kappingini, hóast tær í dag taptu 3-0 móti Team Køge.

Áslakur Holm í VK Vestsjælland
Eftir at Eurovolley undankappingarnar hjá monnunum vóru liðnar, flutti Áslakur Petersson Holm til Danmarkar og byrjaði at leika við VK Vestsjælland. Áslakur, sum er hevari á manslandsliðnum og var hevari hjá ÍF, hevur tikið dystin upp á einum rættuliga rutineraðum liðið hjá VK Vestsjælland.

VK Vestsjælland liggur nr 5 í donsku elitudeildlini hjá monnum, men hava ein dyst til góðar í mun til kappingarneytarnar. Hesin dysturin, sum er móti botnliðnum DHV Odense, verður leiktur mánakvøldið.

Tróndur Hansen í Amager VK
Tróndur Høgnason Hansen er tann av núverandi føroysku leikarunum, sum hevur leikt longst í donskum top-flogbólti. Tróndur byrjaði í Amager VK tá kappingin byrjaði í 2021 og fekk Tróndur satt gjøgnumbrot sum álopsleikari í donsku kappingini og lá fleiri vikur á sonevnda dream team fyri bestu leikararnar í donsku kappingini fyri menn.

Amager VK er ikki komið væl frá byrjan og liggur nú nr. 8 í kappingini eftir 5 dystir. Tróndur hevur enn ikki verið á vøllinum, tí hann hevur verið darvaður av einum skaða í øksluni, men væntandi er økslin í lagið aftur eftir stutta tíð.