Góðar væntanir til DM-kapping í boksing

Í morgin fara fýra nevaleikarar frá Tórshavn Boksing til Danmarkar, har teir skulu luttaka í DM kapping fyri byrjarar, sum verður hildin í Aabenraa.

Teir fýra boksararnar hava stórar væntanir. Ikki minst eftir at teir farna vikuskiftið fingu miðvísa av trimum royndum boksivenjarum úr Danmark.

Teir fýra føroysku boksararnir eru hesir:

Teitur Annand luttekur í U19 í vektflokkinum 54-57 kilo. Hann hevur boksað tveir dystir og tapt báðar, og mætir sama mótstøðumanni aftur nú um vikuskiftið.

- Ein skuldi trúð, at tað var keðiligt, men vit hava vent uppgávuna við, og síggja tað sum ein møguleika at kenna mótstøðumannin. Vit hava arbeitt við at rætta mistøk, og hesaferð fer tað at síggja øðrvísi út, sigur Martin Meng, venjari í Tórshavn Boksing, og leggur afturat:

- Teitur hevur ment seg nógv, og fekk pussað tað seinasta av nú um vikuskiftið hjá Lars Gierringe frá Bokseteam Helsinge, sum er ein royndur venjari við 38 ára royndum, og sum hevur vant nógvar toppboksarar gjøgnum ár og dag. Mótstøðurmaðurin verður ovfarin, um hann væntar tann sama Teit sum seinast.

David Kunoy luttekur í U19 í vektflokkinum 63,5-67 kilo – hevur boksað tríggjar dystir og vunnið tveir teirra.

- Mótstøðumaðurin hjá honum gav avboð í gjár, so vit vóru noydd at flyta hann ein vektflokk upp til 67-71 kilo. Dagsvektin hjá David liggur um 68-69 kilo, so tað verður ikki nøkur avbjóðing fyri hann.

- David er í góðum formi og er ein sterkur boksari, sum er við at sláa navn sítt fast í Danmark. Hann megnar allar streingir í ítróttini og eg ein boksari, ið er trupul at lesa. Tí rokna við við, at David boksar gullið heim um vikuskiftið, sigur Martin Meng.

Magni Vang luttekur í U19 í vektflokkinum 71-75. Hann skal boksa sín fyrsta veruliga dyst um vikuskiftið.

- Vit vænta, at hann fer at klára seg væl í ringinum. Magni boksar vakurt og stílreint og er ein boksari, sum er væl á veg. Um tað røkkur til gull verður spennandi. Men vit eru sannførd um at fáa ein góðan dyst.

Jonathan Malaikev er royndasti boksarin. Hann boksar í elite-bólkinum í vektflokkinum 57-60 kilo. Hevur boksað seks dystir og vunnið fýra.

- Jonathan er ein sterkur boksari sum hevur sligið navn sítt fast í danska boksiumhvørvinum. Serliga hansara seinasti dystur í Vordinborg, tá hann vann greitt móti einum lokalum boksara framman fyri túsund heimaáskoðarum vísti hansara styrki.

- Jonathan er til reiðar at taka gullið heim til Føroyar fyri fyrstu ferð, sigur Martin Meng.