Gunnar skal spæla íslendska steypafinalu - móti føroyingum

Um ein mánaða verður íslendska steypafinalan í mansfótbólti. Áður hava føroyingar spælt steypafinalu í Íslandi, og í ár verður tað serstakt, í tann mun at føroyingar skulu spæla móti hvørjum um steypið.

Pætur Petersen hevði fyri stuttum stóran leiklut, tá KA vann á Klæminti Olsen og Breiðablik í hálvfinalu eftir brotssparkskapping. Nú er Jóan Símun Edmundsson lagdur afturat hópinum hjá KA Akuryri, og í gjárkvøldið gjørdist greitt, at felagið skal spæla finalu móti Víkingi Reykjavík.

Gunnar Vatnhamar spældi allar 90 minuttirnar í miðverjuni, tá Víkingur í gjár vann seg í steypafinaluni við 4-1 sigri á KR Reykjavík. Víkingur var á odda 2-0 eftir 18 minuttir, grannarnir javnaðu, tá ein tími var spældur, men Ari Sigurpálsson skoraði tvær ferðir seinastu tíggju minuttirnar. 

28-ára gamli leirvíkingurin hevur vunnið nógvar steypafinalur við barndómsfelagnum Víkingi; nú kann hann skjótt eisini vinna steypakappingina í Íslandi.

Finalan millum oddaliðið í bestu íslendsku deildini og liðið av Akureyri verður 16. september á tjóðarleikvøllinum í Reykjavík.