Haug skal hava høvuðábyrgd í Klaksvík næstu 18 mánaðirnar

Hann vann á Víkingi stutt eftir, at hann tók við sum fyribils avloysari fyri Haakon Lunov. Síðani hevur Espen Haug tapt fyri júst Víkingi (2-0) og 3-0 fyri HB.

Í løtuni eru trýfaldu føroyameistararnir níggju stig aftanfyri oddaliði úr Eysturkommuni. Í næstu viku fer KÍ undir uppgávuna í Champions League, har tað millum annað snýr seg um at halda mongu styrkisstigini. Tað er nú endaliga greitt, at hetta verður við 48-ára gamla Espen Haug sum høvuðsvenjara.

Hetta hevur verið ætlanin í eina tíð, og nú er alt komið uppá pláss. KÍ hevur í kvøld almannkunngjørt, at maðurin, ið kom til Klaksvíkar sum hjálparvenjari, verður skipari á brúnni fyri fótbóltsflaggskipið í Norðoyggjum restina av 2024 og alt 2025 eisini.

Espen Haug hevur sum skilst ikki endaliga A-venjaraprógvið uppá pláss, men loyvir eru givin. Eisini hevur KÍ nú tveir A-venjarar í toyminum rundanum. Í KÍ metir man, at venjarin við royndum úr Raufoss og seinni Gjøvik-Lyn í fjórðbestu, triðbestu og næstbestu norsku deildini, er tann rætti til stóru uppgávuna.

-  Okkara royndir við Espen síðan hann tók yvir sum virkandi høvuðsvenjari hava verið góðar. Hóast óvanliga nógvar skaddar lyklaleikarar, hevur hann loyst avbjóðingarnar fyrimyndarliga í góðum samstarvi við leiðslu, starvsfelagaðar og leikarar. Tað er týðiligt, at 48 ára gamli Espen er og hevur verið virkin í fótbólti bæði sum venjari og leikar. Hóast hann er dámligur, er hann eisini málrættaður. Vit meta, at hann nú er tann rætti at standa á odda við tí stóru ítróttarligu uppgávuni at vera høvuðsvenjari hjá KÍ.

Tummas Lervig, formaður, og Espen Haug, høvuðsvenjari hjá besta mansliðnum hjá KÍ. Hetta til og við kappingarárið 2025 sambært nýggja sáttmálanum millum partarnar (Mynd: ki.fo)

Hetta sigur KÍ-formaðurin, Tummas Lervig, við ki.fo í kvøld. Høvuðspersónurin sjálvur nýtir millum annað høvi at takka familjuni fyri at sleppa at verða verandi.

- Eg eri sera fegin og stoltur at fáa møguleikan at standa á odda og verða høvuðsvenjari hjá KÍ. Hátturin felagið og Klaksvíkin hevur tikið í móti mær hevur verið einastandandi. Saman við venjaratoyminum og leikarunum fara vit at arbeiða hart fyri at gera framstig. Og eg skal eisini takka míni familju í Noreg fyri, at tey geva mær møguleika fyri at halda fram sum fótbóltsvenjari í Føroyum.

Umframt at seta høvuðsvenjara hevur KÍ lagt Kristoffer Kvistgaard afturat venjaratoyminum hjá besta mansliðnum. Hann stjórnaði kvinnuliðnum í fjør og hevur higartil eisini verið venjari hjá KÍ kvinnunum í ár. Nú er Kvistgaard fluttur, og skal eisini hava  ábyrgdina av 1.deild monnum og talentleikarunum, sum eru ávegis til truppin hjá BetriMonnum, skrivar ki.fo.

Les eisini: KÍ-kvinnur skifta venjaran út

Dagført: 22.53