Hava ikki heilt kent sína vitjunartíð í fyrra hálvleiki

Tað er framvegis málleyst, nú steðgur er á Tórsvølli. HB og Derry City hava átt hvør sínar løtur í dystinum, og heimaliðið hevur havt størri møguleikarnir.

HB setti seg á dystin eftir eina løtu, og í 12. minutti var talan um væl gjøgnumspælt álop í høgru. Eingin kom á harða og vandamikla innleggið hjá Áka Samuelsen, men bólturin kom út frá, og staddur stutt uttanfyri brotsteigin smekkaði Emil Berger til. Skotið hjá svenska miðvallaranum rakti stongina. Løtu seinni hevði hann aftur fína skotroynd, men størsta møguleikan hjá HB fekk Dan í Soylu eftir eitt korter.

Hanus Sørensen, Áki Samuelsen, Adrian Justinussen og Mads Borchers spældu væl saman, og Dan royndi seg við skotið fyrstu ferð. Tað fór stutt uppum - miðvallarin var so fríur í brotsteignum, at hann burdi helst tikið eina nerting áðrenn.

Myndir: Sverri Egholm

Liðið hjá Jákup Martini Joensen tyktiskt at hava gott tamarhald á: Við at spæla seg úr trýstinum væl, arbeiða væl uttan bólt og halda Derry frá nøkrum vandamiklum. Seinastu tjúgu minuttirnar hevur útiliðið tó skapt nakrar støður og sitið væl á spælinum í løtum. Tað hevur eydnast væl hjá teimum at broytt leikskipan. 

HB'arnir koma ikki heilt rætt í allar nærdystirnar nú men flyta bóltin fínt og hava samanlagt spælt ein góðan fyrra hálvleik - Mads Borchers hevði eisini fínan fluktara í yvirtíðini, sum málverjin bjargaði. Hetta var eftir gott HB-álop

Conference League 1. umfar
Hósdagin 13. juli á Tórsvølli
HB - Derry City (0-0)

HB (4-3-3): Bjarti Vitalis Mørk - Hanus Sørensen, Bartal Wardum, Hørður Askham, Viljormur Davidsen (L) - Adrian Rúnasson Justinussen, Emil Berger, Dan í Soylu - Áki Debes Samuelsen, Mads Borchers, Ári Mohr Jónsson