Hesum kann KÍ møta í 3. umfari

Eftir at lutakast hevur verið til 3. umfar í bæði Champions League og Europa League er greitt, hvørjum KÍ kann møta - um so føroyamestararnir koma víðari hesa ferð ella ikki.

Champions League: 
Um KÍ megnar at vinna samanlagt á svensku meistarunum, BK Häcken, bíðar vinnarin av hesum dystinum í 3. umfari: 

HJK Helsinki (FIN) / Molde FK (NOR) 

Molde FK er gamla felagið hjá norsku KÍ-venjarunum, Magna Hoseth og Daniel Berg Hestad, umframt verjuspælaranum Vegard Forren. Sivert Gussiås er eisini úr Molde og hevur spælt við ungdóms- og eykaliðnum hjá felagnum. Í Molde-økinum hava tey fylgt við Champions League-luttøkuni hjá KÍ higartil og legendunum í felagnum. Norsku meistararnar eru í favorittleiklutinum móti teimum finsku. 


Daniel Berg Hestad hevur metið fyri dystir við Molde, og í bestu norsku deildini sum heild, og hann og Magne Hoseth (mynd) hava vunnið fleiri steyp við felagnum, ið KÍ skjótt kann renna seg í (Mynd: Sverri Egholm)

Europa League: 
Um KÍ tapir samanlagt í 2. umfari í Champions League, bíðar taparin í hesum dystinum í 3. umfari í Europa League:

FK Žalgiris Vilnius (LTU) / Galatasaray A.Ş. (TUR)

Her er tað mest sannlíkt, at KÍ rennir seg í litaviska liðið. KÍ og Zalgiris spældu í Europa League í 2018. Tá endaði tað 1-2 í Føroyum og 1-1 í Vilnius. Harvið kom felagið, sum nú er litaviskur meistari, tepurt víðari.

KÍ og BK Häcken spæla fyrra dystin í 2. umfari í Champions League mikukvøldið klokkan 19.45 við Djúpumýrar.