Ikki endaliga avgjørt enn í Íslandi

Tveir dystir í fremstu íslendsku deildini vórðu spældir í gjár. Tvey av føroyingafeløgunum spældu.

Víkingur Reykjavík kundi staðfesta meistaraheitið við sigri í grannauppgerð móti KR. Víkingur var eisini á odda 2-0 í steðginum, men útiliðið skoraði tvær ferðir í 2. hálvleiki. 

Víkingur manglaði Gunnar Vatnhamar í miðverjuni. Eysturoyarportalurin skrivar, at leirvíkingurin ikki var við av persónligum orsøkum.

Úrslitið merkir tó, at nú restar bert eitt stig í hjá Víkingi. Tað er eisini nóg mikið, at Valur á 2. plássið ikki far fult stigatal. Fýra umfør resta í. Meistaraheitið hjá Gunnari og liðfeløgunum kann koma í hús sunnudagin, tá Valur spælir móti KR, ella mánadagin í Kópavági. Tá vitjar Víkingur Klæmint Andrasson Olsen og Breiðablik, sum spæla í  Conference League í kvøld.


Víkingur vann síðsta vikuskifti steypafinaluna - greipan bíðar (Mynd: Víkingur Reykjavík)

Pætur legði upp 
Á Akureyri tók KA móti botnliðnum Keflavík, sum fer at flyta niður. Jóan Símun Edmundsson var ikki í hópinum hjá KA, sum skuldi reisa seg eftir steypafinalutapið fyri Víkingi leygardagin.

Tað eydnaðist við 4-2 sigri. Pætur Petersen kom á vøllin miðskeiðis í 2. hálvleiki, og skálvíkingurin legði upp til síðsta málið í dystinum, sum kom í 88. minutti. Mathias Rosenørn, sum í 2021 og 2022 spældi fyri KÍ, vardi Keflavík-málið.

KA Akureyri sær út til at enda á 7. plássi í íslendsku deilini. 12 lið eru.