Julia Naomi Mortensen hevur longt sáttmálan við AaB

Julia Naomi Mortensen hevur valt at leingja sáttmálan við AaB, so hann er galdandi fyri komandi kappingarár. Julia Naomi, ið hevur verið eyðsæð í føroyskum fótbólti seinastu árini, valdi í september í fjør at skifta til danska fótbóltsfelagið AaB. Nú er greitt, at partarnir hava longt samstarvið.

Hetta skrivar heimasíðan hjá AaB kvinnufótbólti.

22-ára gamla tvørakvinnan ynskir at leingja sáttmálan, grundað á góðu úrslitini í fjør tá tær vunnu seg upp í bestu donsku deildina. Afturat hesum gongur Julia Naomi í skúla í Aalborg, og tískil fellir tað henni natúrliga at spæla við einum felagi í Aalborg.

Julia Naomi Mortensen sigur við aabkvindefodbold.dk, at hon sær fram til kappingarbyrjan komandi sunnudag, tá ið tær møta Brøndby IF á útivølli. Vónirnar fyri komandi kappingarár eru góðar, og sum lið stremba tær eftir at liggja í topp 6.

Julia Naomi er millum annað eyðkend fyri sínar góðu teknisku førleikar og spælskil. Hon hevur spælt 22 A-landsdystir fyri Føroyar og skotið tvey mál. Í 2021/2022 spældi hon eisini í bestu donsku deildini. Tá var tað fyri AGF. Í Føroyum hevur hon bert umboðað HB í vaksnamannafótbólti.