Mattias Hellisdal er seldur til svenskan fótbólt

Í gjár spældi hann 90 minuttir á miðvøllinum hjá B36, men eftir øllum at døma verður hetta seinasti dystur fyri barndómsfelagið á hesum sinni.

Sambært upplýsingum hevur svenska felagið Västerås keypt Mattias Hellisdal leysan úr B36, sum hevur fingið eina nøktandi upphædd fyri hann.

Sum skilst fer Mattias av landinum í vikuni - teir seinastu smálutirnir skulu líka koma uppá pláss.

B36 er í løtuni á 5. plássi í Betrideildini - fimm stig aftanfyri Víking á 4. plássi.

Kappast um uppflyting

Västerås SK er úr býnum við við sama navni, sum ikki liggur so langt frá Stokkhólmi.

Liðið flutti niður úr Allsvenskan í fjør og stríðist nú fyri at koma uppaftur í bestu svensku deildina. Í løtuni er Västerås SK á 3. plássi í Superettan - trý stig eru upp til nummar 1 og 2, sum flyta beinleiðis upp.

Mattias Hellisdal í evropeiskum dysti fyri B36 í fjør (Savnsmynd: Sverri Egholm)

Hevur verið á veg í eina tíð

Mattias Hellisdal skal nú royna at hjálpa Västerås upp.

Evnini hjá tekniskt sterka, kvika og skilagóða havnarmanninum hava verið eyðsæð. Hann hevur verið til royndarvenjing í Noreg, og fleiri eygu hava verið á B36'aranum.

19-ára gamli Mattias Hellisdal fekk sítt gjøgnumbrot á besta liðnum longu í 2023 og hevur, sambært FaroeSoccer, spælt 72 dystir fyri besta liðið hjá B36. Tað er einasta felagið, sum sentrali miðvallarin higartil hevur spælt fyri.

Mattias hevur eisini umboðað øll U-landsliðini hjá Føroyum; seinast U21-landsliðið í juni. Nú tekur hann næsta fetið á yrkisleiðini.

Dagført: 09.48