MMA Føroyar: Fýra íslendingar leggjast afturat

Tað verður eitt altjóða tiltak í Høllini á Hálsi 20. mai tá MMA Føroyar verður.

Ein føroyskur kempari verður við. Fróði Vitalis Hansen fer í búrið fyri seinastu ferð sum yrkis MMA-kempari, men eisini verða nógvir útlendskir kemparar við.

MMA Føroyar kunngerð í dag fýra kemparar úr Íslandi.

Fyrireikararnir siga, at atgongumerkjasølan gongur væl, og at tað er at skunda sær at tryggja sær eitt atgongumerki áðrenn útselt er.

Teir fýra íslendingarnir verða lýstir soleiðis:

Aron Franz Bergmann Kristjánsson

- Aron Franz Bergmann Kristjánsson er 22 ára gamal og vigar 68 kg. Hann er longu ein lovandi kempari hjá Mjölnir MMA, hóast hann hevði eina ringa byrjan við trimum tapum. Miðvís venjing hevur givið úrslit, og hann hevur nú sigrað tvær ferðir á rað. Aron byrjaði at venja MMA sum 17 ára gamal og vísti seg at vera eitt natúrtalent. Vit eru sera fegin um, at Aron kemur at kempa til okkara tiltak.

Venet ‘Loverboy’ Banushi

- Venet ‘Loverboy’ Banushi er upprunaliga úr Kosovo og er 28 ára gamal. Í 1999 flýddi hann úr landi sinum undan krígnum. Tá hann kom til Íslands, byrjaði hann at spæla kurvabólt. Sjálvt um kurvabólturin hevði hansara áhuga at byrja við, var tað gjøgnum jiu-jitsu og kickboxing, at hann fall fyri MMA. Sum amatørkempari hevur hann tríggjar sigrar og eitt tap, har eini sigurin var við knockout, og hinar báðar avgjørdu dómararnir. Venet hevur kempað í lættvektsflokkinum, men hann fer at kempa sín fyrsta kamp í welterweight til tiltakið í Føroyum.

Björgvin Snær Gíslason

- Björgvin Snær Gíslason hevur eisini játtað at kempa til tiltakið. Björgvin er 18 ára gamal og vigar 68 kg. Hann fer at kempa sín fyrsta dyst til okkara tiltak 20. mai. Björgvin hevur tíggju ára royndir í karate og hevur kempað fyri íslendska landsliðið á altjóða støði, og nú hevur hann tikið spennandi avgerðina at kempa í MMA.

Hrói Trausti Havsteen

- Hrói Trausti Havsteen vigar 84 kg. og er 28 ára gamal. Hrói hevur lilla belti í jiu-jitsu, hevur kempað í boksing og hevur eisini vant eitt sindur av muay thai. Tiltakið hjá okkum í mai verður hansara fyrsti MMA-kampur. Hrói fer at berjast í miðalvektsflokkinum í okkara tiltaki.