Neistin fær mótstøðu úr Ísrael - Team Klaksvík úr Bosnia

Lutakastið til 1. umfar í EHF European Cup hjá monnum hevur júst verið í Wien. Har gjørdist greitt, hvørjum Neistin og Team Klaksvík skulu spæla ímóti, tá føroyska luttøkan í kappingini fer í gongd í september.

EHF European Cup, 1. umfar
9/10. september og 16./17. september

Holon Yuvalem HC (ÍSR) - Neistin
Team Klaksvík - RK Sloboda (BIH) 

Sum útgangspunkt skulu Neistamenninir til Ísraels fyrst, áðrenn liðið úr býnum Holon, stutt sunnanfyri Tel Aviv, vitjar. Team Klaksvík stendur til at spæla søguligan dyst í Badmintonhøllini í vikuskifti nummar tvey í september, áðrenn farið verður á vitjan hjá felagnum við trimum bosniskum meistaraheitum.

Í fyrstu umførunum í kappingini er tað tó rímiliga vanligt, at liðini gera av at spæla báðar dystirnar í einum landi uppá tveir ella tríggjar dagar.

Í løtuni er lutakastið til 2. umfar, har tað verður greitt, hvørjum H71 og VÍF skulu hitta seinni í september, og hvørjum Neistin og Team Klaksvík spæla ímóti, um tey koma víðari.

Í fyrsta umfari í European Cup hjá kvinnunum eru Neistin og H71 við. Tey møta mótstøðuliðum úr ávíkavist Litava og Italia. Tað er ikki greitt, hvørjum tær kunnu møta í 2. umfari. Meira um hetta seinni.

Neistin skal spæla móti Holon Yuvalem úr Ísrael (Mynd: Sverri Egholm)