Nú kann aftur søkjast um stuðul úr Róðrargrunninum

Nú bjóðar Róðrargrunnur Føroya aftur kappróðrarfeløgum at søkja um stuðul til at smíða kappróðrarbátar.

Á fíggjarlógini fyri 2022 hevur løgtingið játtað 100.000 krónur til kappróðrarbátasmíð, sum kappróðrarfeløg kunni søkja um.

Róðrargrunnur boðar frá, at freistin at søkja um stuðul úr grunninum er um eina viku – 25. apríl. Treytir fyri at fáa stuðul er, at kjølurin er strektur 25. apríl 2023.

Í umsóknini, sum í mesta lagi skal vera ein A4-síðan til longdar, skulu vera kostnaðarætlan, tíðarætlan og upplýsing um, hvør skal smíða bátin. Harumframt skulu í umsóknini upplýsast teldupostur og telefonnummar hjá minst tveimum persónum, sum hava ábyrgd av felagnum, ið søkir.

Umsóknirnar um stuðul úr Róðrargrunninum verða viðgjørdar í mai.

Tey seks, ið stjórna Róðrargrunni Føroya eru:

• Jan Herman Hansen, formaður, ÍSF
  
• Sigga Vang, næstforkvinna, Vinnuháskúlin
  
• Flóvin Eidesgaard, kassameistari, Føroya landsstýri
  
• Jacob Eli Olsen, skrivari, Føroya Lærarafelag
  
• Anna Rein, Kvinnufelagið
  
• Uni Arge, Føroysk Miðlafólk