Fótbóltur

Nýtt navn og nýtt búmerki í Hoyvík

Um tað verður samtykt á aðalfundinum fer felagið formliga at skifta navn til Fótbóltsfelagið Hoyvík - í vanligari talu Hoyvík.

Billa Jenny Jónleifsdóttir hevur gjørt hetta búmerki. Sambært síðu felagsins umboða bókstavurin, stjørnurnar og tann grøni liturin ymiskt (Mynd; Fótbóltsfelagið Hoyvík)

2023-02-02 17:24

Agnar Prestá

Í vetur varð samanleggingin millum FC Hoyvík og Undrið FF veruleiki. Samanleggingin er liður í at styrkja fótbóltsfelagskapin í triðstørsta býnum í Føroyum, so fólkið kann standa saman um eitt felag.

Í samband við samanleggingina skiftir felagið samleika og fær nýtt búmerki. Hetta er longu gjørt. Nýggja felagið boðar eisini frá, at nevndin á komandi aðalfundi fer at mæla til, at felagið broytir navn til Fótbóltsfelagið Hoyvík, tó í vanligari talu Hoyvík. Facebook-síðan hjá FC Hoyvík hevur longu skifti navnið til "Fótbóltsfelagið Hoyvík" og skift vangamyndina til grøna búmerki við hvítu áskriftini.

Nýggja búmerkið er hvítt og skapið er ein savnandi sirkul, sum er samansettur av einum bólti og einum H. Hann skal sambært skrivinum hjá felagnum ímynda Hoyvík, men er eisini er ein mynd fyri eina opna hurð inn í felagið ella víðari út í stóru verð har stjørnurnar møtast, tí "ein dag so ferð Hoyvík út um landoddarnar at kappast".

Nýggja búmerki hjá fótbóltsfelagnum í Hoyvík sum Billa Jenny Jónleifsdóttir hevur gjørt (Mynd: "Fótbóltsfelagið Hoyvík")

Skrivað verður víðari um. hvat tað ymiska umboðar:

- Stjørnurnar á bóltinum mynda leikarar, sum eru grundarlagið í felagsskapinum. Tær boða frá eini bjartari framtíð, og vit seta eina greiða kós móti stjørnunum við veksandi menning fyri fótbóltsfelagsskapin í Hoyvík, har tað er rúm fyri øllum.

- Hvíti liturin umboðar álit, vitan, og tryggleika, sum eru lyklaorð hjá felagnum fyri vøkstur, gróður og samstarv. Búmerkið er reint og minimalistiskt og við nýggja búmerkinum vilja vit í Hoyvík verða ein partur av grógvandi lívinum, sum er her í Hoyvík.

Samanlagda felagið skrivar eisini, at tann grøni liturin eisini skal súmbolisera ymiskt, sum nýggja felagið stendur fyri:

-Vit vilja verða eitt fótbóltsfelag, ið umframt fótbólt, eisini taka atlit til samfelagið, náttúruna, framtíðina og vilja hugsa og virka burðardygt við grønum loysnum og høgum málum. Hetta kunnu vit gera við einum góðum felagsskapi við høgum málum, nærløgdum leikarum og fólki í øllum aldri.

Tað er Billa Jenny Jónleifsdóttir, sum hevur gjørt búmerkið. Felagið í Hoyvík hevur skjótt aðalfund - besta mansliðið hjá felagnum skal spæla í 1. deild í 2023.

Vinarliga broyt tínar kennifíla - og privatlívsstillingar fyri at síggja hetta innihald